بلوچ نیشنل موومنٹ نا جارکش تینا درشان ئٹی پارے کہ واحد بخش عرف استاد واحد کمبر ولد عالی’ بلوچ راجی تحریک آجوئی‘ نا اسہ راہشون اسے ہرادے پاکستانی ڈھکوک ادارہ آک 19 جولائی 2024 آ ہمسایہ ڈیہہ ایران آن زوراکی ئٹ بیگواہ کننگانے۔ استاد واحد کمبر بلوچ تینا تیبہ زند ئے بلوچستان آ پاکستانی کوزہ و زوراکی تا برخلاف جہد ئٹ گدریفے اونا بیگواہی نا برخلاف تیبہ بلوچ راج اوار سلوک ءِ و اونا آجوئی و اودے قانودی حق تننگ نا خواست کیک۔
جارکش پارے کہ استاد واحد کمبر تینا سیاسی مسخت آتیٹ پاش ءِ و اونا جہد کس آن ڈھکوک اف۔ زوراکی نا کوزہ و نوآبادیاتی نظام نا برخلاف راجی تحریک آجوئی و جنگ آجوئی تون جہانی قانود آتا رد ئٹ اونا قانودی و بندغی حق ءِ کہ اودے اسہ بندی ئسے نا وڑ پاش کننگ مرے و اونا قانودی و بندغی حق آتا شرف کننگ مرے۔ یاتی مرے داکان مُست ہم استاد واحد کمبر بلوچ پاکستانی لشکر نا دو آن بیدس عدالت دزگیری، زوراکی نا بیگواہی، ٹارچر و دروغ ئنا دوبہ و مقدمہ تیٹ قیذ و بند ئنا بے بندغی عمل آن گدرینگِسہ آجو مسس و آجو مننگ آن پد روپوش مرسا کوزہ مروک بلوچستان نا آجوئی کن تحریک ئٹ راہشون نا کڑدار ادا کننگ اس۔
انٹر نیشنل کمیونٹی آف دی ریڈ کراس آن جارکش خواست کرسہ پارے کہ جہانی قانود آک جنگی بندی تا حق آتا بارو ئٹ پاش ءُ ہندا سوب آن نن دا حوالہ ئٹ کاریم کروکا جہانی ادارہ ریڈ کراس آن خواست کینہ کہ او استاد واحد کمبر ئے جنگی بندی منفنگ و اونا پاش کننگ ئٹ تینا کڑدار ادا کے۔
جارکش پارے کہ استاد واحد کمبر اسہ کماش ءُ بندغ اسے۔ ننے حوال رسینگانے کہ او اُست ئنا ناجوڑی تون اوار پین ناجوڑی تا گواچی ءِ۔ ہرافتیک اسہ رنگ ڈاکٹر ئسے نا نگرانی و دارو درمان المی ءِ۔ ریڈ کراس زوت اونا آجوئی کن جہد کرسہ اونا خاہوت تون اودے اوڑدئی کرفِہ۔ دا کاریم ئٹی ہُرے کننگ اونا زند ئے خطرہ ٹی شاغنگ کیک۔
جارکش نا پاننگ اس کہ بلوچستان ئٹی پاکستان نا زور ئنا کوزہ نا برخلاف بلوچ راجی آجوئی نا جہد اسہ راستی اسے، ہرادے کوزہ گیر پاکستان ہِچ وڑئٹ ڈھکنگ کپک۔ پاکستان بلوچ راجی آجوئی نا مونٹی سیاسی و جنگی سنگر آ بےسوب مننگ آن پد بلوچ راج ئنا برخلاف زنک ایسری آن بارنگا بندغ دشمن آ چم تِہ کاریم ئٹی ہتنگ ئٹی اے۔ لس مخلوق آ بمباری، مخلوق ئے زورئٹ ہمپفنگ، اُرا و مڈی تِہ ہُشنگ، بندغا تِہ زوراکی ئٹ بیگواہ کننگ، اندھر آ اذیت گاہ تیٹ سزا تننگ، دزگیر کروکا بندغ آتے بےقانودی خلّنگ اوفتا جون تے خسّنگ، پاکستان نا بلوچ زنک ایسری نا ڈوہداری آ گھام تیٹ اوار ءُ۔
او پارے کہ پاکستان نا بلوچ زنک کشی نا کاروائیک کوزہ مروک بلوچستان اسکان افس بلکہ پاکستانی جبر و استبداد و زنک کشی نا بھرم ئٹی ہمپ ءَ لڈ و ایلو ڈیہہ تیٹ باہوٹ مروکا بلوچ آک ہم تیبہ جہان ئٹ پاکستان نا دننگا بے بندغی پالیسی تا گواچی مسنو۔ پاکستانی ایجنٹ آتا دو آن واحد کمبر بلوچ نا بیگواہی دا زوت ئنا تدینی اسے داکان مُست ہم بی ایس او آزاد نا مسکوہی چیئر پرسن لمہ کریمہ بلوچ ئے کینیڈا ٹی، پنی آ بلوچ صحافی ساجد حسین ئے سویڈن ئٹی، بالاچ مری، استاد اسلم بلوچ، چنکا میر عبدالنبی بگلزئی، انجینئر عبدالرازق بلوچ تون اوار کیہی بلوچ راہشون و باہوٹ آتے اوغانستان ئٹی پاکستانی ایجنٹ آک شہید کننگ نا ڈوہداری ئے کرینو۔ اندن ہمسایہ ڈیہہ ایران نا انتظامی سیم ئنا تہٹی ہم دائسکان کیہی بلوچ آک پاکستانی ایجنٹ آتا دو آن شہید کننگانو ہرافتیٹی شمِ سر ئٹی ایرانی انتظامی سیک ئنا تہٹی بی این ایم نا سروک دوستا بلوچ تون اوار کیہی بلوچ آتا اُعا تیا میزائل جلہو ئٹی دوستا بلوچ تون اور چُنا نیاڑی تا شہیدی ہم اوار ءِ۔
جارکش پارے کہ پاکستان ہمسایہ ڈیہہ تتون اوار مُچا جہان ئٹی بلوچ آتا برخلاف زوراکی نا چم آن کاریم ہلنگ ئٹی ءِ تاکہ بلوچ جہد ئنا راہشونی کروکا تِہ چھٹفسہ آجوئی نا جہد ئے توننگ کے۔ جنگی قانود و بندغی حق آتا برخلاف پاکستان نا دا پالیسی ئے ہچو وڑئسیٹ راست پاننگ مفک۔ دا بندغی نا برخلاف پاکستانی ریاست نا ڈوہ ءُ ہرافتا جہانی تیبر آ اوڑان حساب ہلّنگ مرے
