بلوچستان لبریشن فرنٹ نا ترجمان میجر گہرام بلوچ تینا شنگ کروک بیان ئٹی پارینے کہ بی ایل ایف نا کنڈ آن دشت ئٹی ٹمبر مافیا ئے خبردار کننگک کہ او جنگل آتے گُڈنگ آن پد مریر نہ تو اوفتا برخلاف سخت کارروائی کننگو۔ جنگل آتے گُڈنگ ئٹ ہرا بندغ آتا دو ارے اوفتے بی ایل ایف نا کنڈ آن دزگیری، جرمانہ و مالی و جانی نسخان تون مون تروئی تمو۔
او پارے کہ تدوکا منَہ دے آن برجاء دا کاریم ئے خڑک آن ہُننگ اُن و دا کاریم ئٹ ہرا بندغ آتا دو ارے، بے ہندی ٹھیکہ دار و دا کاریم نا مخ تفی کروک زہم تخوکا بندغ آتا پیدواری مسنے۔ بی ایل ایف کیہی وار پارینے کہ تنظیم بلوچستان نا وسائل آتا لٹ و پل، جنگل آتے گُڈنگ، تجارتی مسخت کن پھیش ئنا بھلو کچ ئسیٹی کارمرز و جنگلی ساہدار تا شکار کننگ کن الوف و دا بیان ئے ٹمبر مافیا ایسری دڑکو سرپند مرسا دمدستی تینا رد انگا کاریم تیان پدی مرے۔
ترجمان پارے کہ بی ایل ایف ئے السی غاو رسینگانے کہ دشت ئنا علاقہ کنچتی، بشولی، کوھک، کڈان آن ہلیس جان محمد بازار اسکان منَہ بندغ بھلو کچ ئسیٹی جنگل آتے گُڈنگ ءُ: رخت آتا گُڈنگ کن بے ہندی و ہندی ٹھیکہ دار آتتون سودہ بازی مننگ ءِ۔ بلوچستان نا جنگل آک ننا راجی میراث آک ءُ اسہ بندغ یا قبیلہ نا میراث افس۔ دا جنگل آتا اسہ ٹھول ئے ہم تجارتی مسخت ئٹ گُڈنگ کن الوفن۔ ہرا بندغ آک بلوچستان ئے بے وارث سرپند مرسا دا ڈوہداری آ کاریم ئے “کاروبار” جوڑانو او دا استان دپس کہ بلوچ راجی مفاد آتا دفاعی ادارہ آک ساڑی اریر۔
اونا پاننگ اس کہ بی ایل ایف بلوچ الس ئنا تاغت ءِ ہرادے السی امیت اتا رد ئٹ بلوچ راجی مفاد آتیکن کارمرز کننگو و نن دا اسل خواہپنہ کہ دا راجی تاغت اصل دشمن نا جاگہ غا پین جاگہ ئس کارمرز مرے یا ونڈ مرے۔ اندا سوب آن کُل باشعور بندغ آتیان خواست کینہ کہ بلوچستان نا جنگل، جنگلی ساہدار و ماحول نا رکھ کن اوار توار ہرفبو تاکہ دادے توننگ کن تاغت کارمرز کننگ نا ضرورت تَمپ۔
او پارے کہ مُد ئنا بدلی تیوہ جہان کن اسہ چینلج ئس جوڑ مسنے۔ بلوچستان ئٹی ہم دانا زہم ہر سال ئنا پِر تیٹ ہار ئنا دروشم ئٹ خننگ مریک۔ جنگل آتا گُڈنگ آن دا حالیت پین خراب مرو۔ چاہندار و مُد ئٹ بدلی آ نظر تخوکا تا پاننگ ءِ کہ بلوچستان ئٹی رخت خلنگ ئٹ بھاز کمبوتی مسنے۔ بلوچستان ئٹی پاکستانی لشکر ہم جنگل تے ہُشنگ ئٹ تُد ءِ و دا ڈوہدار تا کُل آن زیات مخ تفی و جنگل آتے گُڈنگ ئٹ ہم تُد ءِ۔
او ودیک پارے کہ بلوچ الس ئے ہر تلہ غا تینا جنگ ئے تینٹ کروئی تمو ہراٹی مُد ئٹ بدلی ہم اوار ءِ۔ ننے رخت آتے گُڈنگ نا جاگہ غا رخت خلنگ نا گُرج ءِ، بلوچستان نا ہندی ادارہ غاک و الس ہم ماحولیات و جنگلی ساہدار تا رکھ کن دا مہم ئٹ اوار سلِر۔
ترجمان ایسر ئٹ پارے کہ دا مافیا ئے ایسری وارننگ ءِ کہ دمدستی جنگل آتے گُڈنگ ئے بند کے نہ تو تینا مالی و جانی نسخان نا ذمہ وار تینٹ مرور۔
