بلوچ نیشنل موومنٹ نا بندغی حق آتا ادارہ پانک ئنا تُوئی رپورٹ نا رد ئٹ جولائی نا تُو ئٹی بلوچستان ئٹی پاکستانی لشکر 3 بندغ بیدس عدالت کھسفینے و 35 بندغ زوراکی ئٹ بیگواہ کرینے۔
بی این ایم نا ادارہ ’ پانک ‘ ہر تُو بلوچستان ئٹی بندغی حق آتا حالیت آ رپورٹ شنگ کیک۔ و جولائی نا تُو ئنا رپورٹ داسا شنگ کننگانے۔
جولائی نا رپورٹ نا رد ئٹ پاکستانی لشکر نا دو آن 35 بندغ زوراکی ئٹ بیگواہ کننگ آن بیدس کیہی بندغ آتے بےقانودی دزگیر ہم کننگانے۔ کیچ آن 8، آواران آن 7، خضدار آن 6، مستونگ آن 2، شال آن 13، خاران آن 5، گوادر آن 3 و کراچی آن 5 بلوچ شاری زوراکی ئٹ بیگواہ و بےقانودی دزگیری نا گواچی مسنو۔
رپورٹ ئٹ پاننگا کہ بلوچستان ئٹی زوراکی ئٹ بیگواہ کننگوک بندغ آتا برانز آ ریاستی ادارہ آتا بےدادی ہڑدے نا کاریم ئس جوڑ مسنے، پانک ئنا رپورٹ ئٹی دا حالیت آ فریشانی نا درشانی کرسا پاننگا کہ 28 جون 2024 آ پولیس نا ادارہ انسداد دہشت گردی ( سی ٹی ڈی ) ظہیر بلوچ ئے دزگیری آن گڈ بیگواہ کرے ہراڑا اونا خاہوت سریاب روڈ شال ئٹی تولوک برانز کرے۔ پرایمن برانزی تے بِننگ و اوفتا ویل ئے ایسر کننگ نا جاگہ غا برانزی تیا بےدادی کرسا اوفتے دزگیر کننگا۔
پانک داکان بیدس تربت ئٹی زوراکی ئٹ بیگواہ کننگوک بندغ آتا خاہوت آتا مُرغنا تولوک برانز آ پام ترفے ہراڑے خاہوت آک 48 آن ہلیس 45 ڈگری سیلیسئس درجہ حرارت آن بیدس برانز آ تولوک اسر ہرا دائسکان برجاء ءِ ولے اودے حکومت اسہ وڑ نظر انداز کننگ ءِ۔ ضلع خضدار نا تحصیل نال ئٹی خلق کوچہ ئے گھیرہ کرسا جلہو کننگا، زالبول تیا بےدادی کرسا اوفتے ٹپی کننگا و 6 بندغ زوراکی ئٹ بیگواہ کننگو۔ خاہوت آک داڑا سی پیک ایم 8 لنک روڈ ئے بند کرسا تولوک برانز کریر انتظامیہ دزگیر کروک بندغ آتے یلہ کننگ نا قول کرے ولے اوڑا عمل کننگ متو۔
پانک ئنا رپورٹ ئٹی بلوچ راجی مچی آ ریاستی بےدادی نا ہم پاننگا۔ پانک ئنا رپورٹ نا رد ئٹ 28 جولائی، 2024 آ بلوچ یکجہتی کمیٹی بلوچستان ئٹی بندغی حق آتا لتاڑ، زوراکی نا بیگواہی و بیدس عدالت خون تا برخلاف گوادر ئٹی جلسہ کرے۔ پرایمن جلسہ ئے حکومت تاغت نا زور آ تورے۔ مستونگ، حب چوکی و تربت ئٹی جلسہ غا ہنوکا بندغ آتیا بےدادی کننگا۔ راجی مچی ٹی اوار مروکا تِہ جلسہ غا ہِننگ آن توننگ آ تیوہ بلوچستان ئٹی برانز کننگا۔ برانزی تا برخلاف بیدس جواز و بےضروری تاغت کارمرز کننگ نا سوب آن مستونگ ئٹی 14 برانزی ٹپی مسر ہرافتیان عبدل مطیب بلوچ پنی ءُ بندغ ئسے نا کاٹم زیات ٹپ مننگ نا سوب آن اونا حالیت بھاز خراب ءِ۔ تربت ئٹی 25 برانزی پاکستانی لشکر نا بےدادی تیا ٹپی و اصغر بلوچ پنی ءُ بندغ ئس بیران مس۔ گوادر ئٹی حالیت پین خراب مس ہراڑے راجی مچی ٹی اوار مروکا و برانزی تیا ایف سی، سی ٹی ڈی پولیس و ڈھکوک ادارہ آک آنسوگیس ئنا شیلنگ کریر، سم کاری کریر و لٹ کُٹ کریر، دا بےدادی تا سوب آن اسہ ورناس بیران و کیہیک ٹپی مسر۔
پانک ئنا رد ئٹ جولائی نا تُو ئٹی ہم بلوچستان ئٹی بندغی حق آتا حالیت خراب اس۔ بلوچستان ئٹی پاکستانی لشکر نہ بیرہ تینا آئین بلکہ جہانی بندغی حق آتا قانود آتے لتاڑانے، دا حالیت ئٹی بلوچ راج ئنا بنداوی حق آتا رکھ کن دمدستی جہانی مداخلت و پاکستان آن حساب ہلنگ المی ءِ۔
