نوشت: بانڑی بلوچ
زرمبش نوشتانک
او مہر و مابت نا استار، او بڑز حوصلہ، دلیری و مزاحمت نا چیدہ۔ بلوچستان نا دڑد اونا خن تیان خڑینک مرسا وہیک، بلوچستان نا مزاحمت نا دیہاڑ اونا جوڑ تیا بشخندہ مرسا تالان مریک۔ اونا حوصلہ چلتن آن بڑز ءِ کوہ باتیل آن سوگو ءِ۔
او تینا راج ئنا پیر زال آ لمّہ و کماش آتا حوصلہ ءِ، بیگواہ تا ایڑ تا تاغت ءِ۔ او کُل ئنا حوصلہ جوڑ مریک، بیگواہ تا لمّہ غا تا کاٹم تینا دروت ہلیک، بھاکُر کیک تسلہ ایتک، کماش تا کاٹم تینا دروت ہلیک اوفتے ہمت ایتک، او کُل ئنا امیت جوڑ مریک۔ ولے وختس کہ شدت جزبات آن اونا خن تیان خڑینک وہیک بلوچستان نا ڈکھیائی آ لمّہ غاک تینا دڑد ئے استان درسا اونا حوصلہ مریرہ، اونا کاٹم آن دروت ہلِسہ اودے حوصلہ ایترہ۔ ایلمک اونا دو تیان دروت ہلیرہ اودے شرف ایترہ۔
او بشخندہ کیک تو بلوچستان بشخندہ کیک۔ بلوچستان ہوغِک تو او ہوغِک۔ او روان ءِ، تینا کاروان تون، مزل نا کنڈ آ گھام خلنگ ءِ، اونا کاروان ئٹ چنا نیاڑی، پیر ءَ ورنا، کُل اوار ءُ، پابو اودے دیر توننگ کیک۔ کس ارے کہ اودے خُلیفنگ کے؟ کس ارے کہ اودے بے امیت کننگ کے؟ کس ارے کہ اونا مونا سلِہ؟ کس ارے کہ اودے اونا کسر آن رد تننگ کے ؟
او شہید آ غفار نا دلیر آ مسڑ۔۔۔ سینہ ٹی ڈکھ کھڈ کرینے بھلن مسنے، او تینا لکھ مرادی آ باوہ نا جشوک جون ئے ہرفینے۔۔۔ او باوہ نا وے ساڑی گری ٹی زند ئنا سختی سوری تتون مون تسنے۔۔۔ او ایلم نا بیگواہی نا برخلاف سلیسہ اودے زندان تیان کشانے۔۔۔ پابو اودے دیر توننگ کیک۔ او راہشون ودی متوسس، ولے زند ئنا چکاس آک، راج ئنا ڈکھ آک، سامراج نا ظلم آک، اودے راہشون جوڑ کریر۔ اینو او سلوک ءِ، تینا بُڑز انگا حوصلہ تون ایٹمی ءُ تاغت ئسے نا مونا۔ اینو او سلوک ءِ و اونا پد آ اونا راج سلوک ءِ۔ اونا راج اونا تاغت ءِ، و او تینا راج ئنا تاغت ءِ۔
وخت راج آن خواست کیک کہ او تینا راہشون ئے تینٹ گچین کے، و ہر وخت ئٹ راج تینا راہشون تے تینٹ گچین کیک۔ اندن کہ بابا خیر بخش مری ئے راج تینا راہشون گچین کرے، شہید غلام محمد ئے راج تینا راہشون گچین کرے، لمّہ کریمہ ئے راج راہشون و لمّہ نا جاگہ ئے تس، ڈاکٹر اللہ نزر ئے راج تینا مسیحا پارے، اندن اینو راج ولدا اسہ راہشون ئس گچین کرینے۔ راج اوڑ کن ساہ ئے تننگ کن تیار ءِ، راج اونا اسہ توار آ سینہ غا تے سُم تا مونا پیش کننگ کن تیار ءِ۔ و او تینا راج ئنا چُنکا بھلا خوشی و ڈکھ ئٹ اوفتتون سلوک ءِ۔
او کُل سختی سوری تیان بیدس ہم تینا راج تون سلوک ءِ، و راج اوڑتون سلوک ءِ۔ راج ئے اونا ضرورت ءِ و اودے دا جنگ ئٹ راج ئنا ضرورت ءِ۔ اودے راج کن، راج تون اوار پندھ خلوئی ءِ، تو پابو اودے دیر توننگ کیک۔۔ او راہشون ءِ و او روان ءِ اودے کس ہم توننگ کپک۔
