حوال تا رد ئٹ ضلع کیچ ئنا تحصیل بلیدہ ٹی سلاہ بند ٹولی ئسے نا بندغ آتا سم کاری آن خوانندہ ئس بیران مسنے۔
شابیتی حوال تا ردئٹ بلیدہ صاحب خان بازار ئٹی موٹر سائیکل آ سوار سلاہ بند بندغ آک انور نا مار رحیم جان ئے اونا دکان ئٹی سم کاری کرِسہ کسفینو ہرا ساچ اسکول چیئرمین عبدالرحمن بازار کیمپس نا خوانندہ ئس اس و علاقہ ٹی چاگڑدی کاریم کریکہ۔
ہندی بندغ آک تدینی نا مذمت ئے کرِسہ پارینو کہ دا بھاز اُست ہسونی ءُ ہیت اسے کہ مسکین و معصوم آ بندغ آک دننگا تدینی تا گواچی مننگ ءُ۔ دننگا تدینی تیان علاقہ نا ایمن خراب مننگ ءِ، ہراڑے دننگا تدینی تیان اسہ تپہ ئسے نا بندغ ئس ہم رکھوک اف۔
پاننگک کہ ہرا بندغ آک اودے کھسفینو اوفتا تعلقداری سرکاری مُخ تف ٹولی تیان ءِ، داڑان مالو دا ٹولی بلیدہ ٹی کیہی خون و ڈوہ تیٹ اوار مسنے۔
