شش سال آن بیگواہ راشد حسین نا لمّہ نا پاننگ ءِ کہ تینا مار ئنا وے آجو مننگ نا برخلاف کوئٹہ ٹی برانزی ریلی اڈ ایتون۔
او پارینے کہ پاکستان ئٹی عدالت آک انصاف تننگ ئٹی بےسوب مسنو و ریاست بلوچ نا ویل ئے ایسر کننگ ئٹی سوبری نا درشانی کننگ اف۔
سوشل میڈیا آ تینا اسہ ویڈیو کلہو ئسیٹی بیگواہ راشد حسین نا لمّہ کوئٹہ ٹی ساڑی سیاسی و بےسیاسی ہر وڑ ئنا فکری تپہ آتیان تعلقداری تخوکا بندغ آتیان خواست کرینے کہ او 18 اگست آ راشد حسین نا آجوئی کن مروکا برانز ئٹ اوار مریر۔
راشد حسین نا لمّہ پارینے کہ انصاف کن نن کُل قانودی دروازہ غا تے ٹُھکفینن، انصاف کن کراچی آن کوئٹہ و کوئٹہ آن اسلام آباد اسکان عدالت آتا دروازہ غا تیا ہنانُن ولے ننے دائسکان انصاف تننگ متنے۔
او پارے پاکستان ئٹی قانودی وڑ و ڈول ئٹ انصاف دوئی کننگ منکن اف اندا سوب آن زوراکی ئٹ بیگواہ کننگوک بندغ آتیکن الس توار بڑز کے۔
