بلوچستاب لبریشن فرنٹ نا ترجمان میجر گہرام بلوچ تینا شنگ کروک بیان ئٹی پارے کہ تربت، جھاؤ، تمپ و مشکے ٹی دشمن لشکر آ پنچ جلہو تیٹی اسہ کارندہ ئس مرگ ئنا گواچی، کیہیک ٹپی مننگ تون اوار اوفتے مالی نسخان ہم رسینگا۔
او پارے کہ سرمچار آک سینزدہ و چھانڑدہ اگست نا شام ئنا دہ بجہ آ کیچ ئنا بنجائی شار تربت ئٹی لشکری چوکی و گاڑی تِہ اسہ وخت جلہو کریر۔ جلہو ئٹی اِرا کارندہ مرگ ئنا گواچی و مُسٹ ٹپی مسُر۔
او پارے کہ سرمچار آک تربت ئٹی ائیرپورٹ چوک آ فوجی چوکی و اونا مونا سلوک چار گاڑی تے خودکار و بھلا سلاہ تیٹ ٹک کریر۔ لشکری گاڑیک چھانڑدہ اگست نا رد ئٹ کسر ئے بند کروک سلوک اسُر۔
ترجمان پارے کہ آواران نا ہند جھاؤ ٹی دارو کوچہ مش ئنا زیہا ساڑی لشکری چوکی ئے سرمچار آک چھانڑدہ اگست نا شام ئنا ہفت بجہ آ مُست اسنائپر ئٹ ٹک کرسا اسہ کارندہ ئسے مرگ ئنا گواچی کریر و پدا راکٹ و پوسکن انگا سلاہ تیٹ جلہو کریر۔ دا جلہو ئٹی اسہ پین لشکری کارندہ ئس کھسک و کیہیک ٹپی مسُر۔ سرمچار آک دشمن نا اسہ ڈرون کیمرہ ئسے ہم ٹک کریر۔
اونا پاننگ اس کہ تمپ ئنا ہند کلاہو ٹی چھانڑدہ اگست نا شام ئنا نُہہ بجہ آ کوزہ گیر لشکر نا چوکی آ پوسکن انگا و بھلا سلاہ تیٹ جلہو کرسا دشمن لشکرئے جانی و مالی نسخان تننگا۔
او پارے کہ اندن سرمچار آک سنزدہ اگست آ شام ئنا نُہہ بجہ آ مشکے گورکائی کرکس ٹی ساڑی کوزہ گیر پاکستانی لشکر نا چیک پوسٹ آ بھلا سلاہ تیٹ جلہو کریر۔ دا جلہو ئٹی دشمن نا اسہ کارندہ ئس مرگ ئنا گواچی مس۔
او ودیک پارے کہ اسہ پین جلہو ئسیٹی سرمچار آک سینزدہ اگست آ شام ئنا نُہہ بجہ آ مشکے جیبری ٹی دشمن پاکستانی لشکر نا کیمپ آ پوسکن انگا و بھلا سلاہ تیٹ جلہو کریر۔ جلہو ئٹی دشمن لشکر نا اِرا کارندہ کھسک مُسٹ ٹپی مسُر و کیمپ ئٹی سلوک دشمن نا گاڑی تے نسخان رسینگا۔
ترجمان نا پاننگ اس کہ بلوچ راج سرمچار آتون سلوک مرسا پن ئنا آجوئی نا مجلس آتے بےسوب کرے۔ کوزہ گیر پاکستان نا پن ئنا آجوئی نا دے چھانڑدہ اگست ئے رد کرسا دا ہیت صاف کرینو کہ داسا دشمن و اونا کُمکار آتے بلوچ سرزمین ئٹی ہچو جاگہ ئس افک۔ اینو بلوچ راج دشمن آن اونا کُل ڈوہ تا بیر ئے ہلنگ کن پر عزم ءِ۔
او ایسر ئٹ پارے کہ بلوچستان لبریشن فرنٹ دا جلہو تا ذمہ واری تے ہرفک۔ کوزہ مروکا بلوچستان نا آجوئی اسکان کوزہ گیر لشکر آ جلہوک برجاء مرور۔
