بلوچ نیشنل موومنٹ (بی این ایم) نا چیئرمین ڈاکٹر نسیم بلوچ تینا درشان ئٹی آپسر کیچ ئنا شہید امداد بجیر و رضا جہانگیر ئے اوفتا یانزدمیکو شہیدی نا سال پوروی آ دروت ندر کرسا پارے کہ چھانڑدہ اگست نا سُہب توب پاکستانی لشکر بی این ایم نا ہندی راہشون، قلم کار و چائندار امداد بجیر نا اُرا آ جلہو کرسا اودے و بی ایس او آزات نا سیکریٹری جنرل رضا جہانگیر ئے شہید کرے۔ ہڑتوما سیاسی کاریم کروک و دُو ہورک اسر ولے امداد بجیر نا اُرا ئے ہندن راکٹ نا گولہ خلکُر ہرا وڑ جنگ ئنا سنگر آن جنگ کروکاک خَلیرہ۔ پاکستان ہندنو نہارو ریاست اسے ہرانا خُڑکا دو ہورک و سِلاہ بند آ جہدکار نا فرخ چُھٹانے۔
او پارے کہ اگست نا تُو نہ بیرہ بلوچ بلکہ مُچا خطہ نا راج آتیکن مونو دے اسے، چھانڑدہ اگست آ متحدہ ہندوستان نا پھڈ آن پراکسی ریاست ئس (پاکستان) انگریز تینا مفاد آتا رکھ کن جوڑِسہ سرسوب مس ولے اینو اسکان بلوچ، سندھی، پشتون، کشمیری و ایلو محکوم آک انگریز نا دا کاریم نا نہاد ئے پُھر کننگ ئٹی ءُ۔
ڈاکٹر نسیم بلوچ پارے کہ بلوچ سیاسی تحریک نا سمبھالنگ کن سیاسی کاریم کروکا تا اسہ مُرغنو چرجوئی سے ہرا سیاسی بیداری، راجی و آشوبی فکر ئے تالان کننگ کن تینا ساہ تِہ ندر کریر، ہرافتیٹ امداد بجیر و رضا جہانگیر اِرا بھلو پِن ءُ ہرافتِہ نن یات کننگ ئٹی اُن۔ رضا جہانگیر و امداد بجیر سخت انگا سیاسی وخت آتیٹ ہم سوگوی ئٹ نَت آ سلِسہ تنظیم و پارٹی کن جہد کریر۔ اُلس ئے سیاسی پِڑ آ بش کننگ کن گُڈیکو دم اسکان سلیسر۔
بی این ایم نا چیئرمین پارے کہ شہید امداد بجیر اسہ ادیب، زانت کار و سوگوؤ فکر ئسے نا سیاسی راہشون ئس اس، او بی این ایم نا کاریم تیان ہلیس ادبی تخلیق شنگ کننگ و بشخنگ ئٹی ہم بھلو کڑد ئس نشان تِس۔ بلوچ راجی جہد ئنا بھازا پلّو آتا کیہی نوشت لکّھا۔ بی این ایم نا آشوبی تلہ آن شہید چیئرمین غلام محمد بلوچ نا فلسفہ آ دھڑنگسہ مدامیئو کڑدار ئس جوڑ مس و بلوچ راجی تاریخ ئٹی مدامی زندہ سلیس۔
ڈاکٹر نسیم بلوچ پارے کہ بی ایس او آزات نا سیکریٹری جنرل رضا جہانگیر چُنک سنی ٹی ہم فکری وڑئٹ بُڑز ہند آ سَلوک اس، او سخت انگا وخت آتیٹ تنظیم نا کاریم و بلوچ خوانندہ آتے فکری بنداو آ آجوئی نا جہد کن بش کننگ کن بھازا وڑئٹ کاریم کرے و ہندا سفر ئٹی امداد بجیر تون اوار دشمن اودے شہید کرے۔
