بلوچستاب لبریشن فرنٹ نا ترجمان میجر گہرام بلوچ تینا شنگ کروک درشان ئٹ پارے کہ سرمچار آک کیچ ئنا جتا ہند، مشکے و آواران ئٹی دشمن آ یانزدہ جلہو کریر ہراٹی اوفتے سخت جانی و مالی نسخان رسینگا۔ دشمن لشکر آ ہمو وخت جلہو کننگا ہراتم او پاکستان نا پن ئنا آجوئی نا مجلس تے اڈ تننگ اسُر۔
او پارے کہ کیچ ئنا جتا ہنداتیٹی سرمچار آک کوزہ گیر پاکستانی لشکر نا چیک پوسٹ آتے ہمو وخت ٹک کریر ہراتم او پن ئنا آجوئی نا خوشی تا تیاری ٹی آختہ اسُر۔ کیچ ئنا ہند سامی کلگ، ہیرونک، ہوشاپ و کولواہ ٹی سرمچار آک سینزدہ اگست نا شام ئنا ہشت بجہ آن چھانڑدہ اگست نا دے اسکان جلہو کریر۔
اونا پاننگ اس کہ سامی کلگ ئٹی سرمچار آک دشمن نا چیک پوسٹ آ پوسکن و بھلا سلاہ تیٹ جلہو کریر۔ جلہو ئٹی دشمن لشکر نا اسہ کارندہ ئس مرگ ئنا گواچی و مُسٹ ٹپی مسُر۔ اندن ہیرونک جلہو ئٹی سرمچار آک پوسکن انگا سلاہ تیٹ دوارہ جلہو کریر۔ اِرٹنگا جلہو تیٹی دشمن نا اِرا کارندہ مرگ ئنا گواچی و اسٹ ئس ٹپی مس۔
ترجمان پارے کہ ہوشاپ جلہو ئٹی سرمچار آک دشمن نا کیمپ آ بھلا سلاہ و راکٹ آتیٹ سخت جلہو کریر ہراٹی کوزہ گیر لشکر نا مُسہ کارندہ ٹپی مننگ تون اوار اوفتے مالی نسخان ہم ہرفوئی تما۔
او پارے کہ سرمچار آک سنزدہ اگست و چھانڑدہ اگست نا شام ئنا ہشت بجہ آ کولواہ مادگِ قلات ئٹی کوزہ گیر پاکستانی لشکر نا کیمپ آ پوسکن و بھلا سلاہ تیٹ جلہو کریر، جلہو نیم گھنٹہ اسکان برجاء سلیس۔ جلہو ئٹی دشمن لشکر نا اسہ کارندہ ئس مرگ ئنا گواچی و مُسٹ ٹپی مسُر۔
دا جلہو تیان پد دشمن لشکر لس مخلوق آ سُمکاری و مارٹر خلک۔
او ودیک پارے کہ سرمچار آک آواران نا ہند مشکے ٹی بنڈوکی، اوگار، ملش بند و تنک ئٹی دشمن نا چیک پوسٹ آتے ٹک کریر، سنزدہ و چھانڑدہ اگست نا نیامیکو نن مروکا جلہو تیٹی پوسکن و بھلا سلاہ تے کارمرز کننگا، جلہو ئٹی مُسہ کارندہ خلنگا و چار ٹپی مسر۔
او پارے کہ آواران نا ہند زانکولی، کور ڈاٹ و کنیرہ ٹی مُسہ جتاؤ جلہو سینزدہ و چھانڑدہ اگست نا نیامیکو نن کننگار، دا جلہو تیٹی سرمچار آک بھلا سلاہ تے کارمرز کریر ہراڑان کوزہ ل گیر لشکر نا اسہ کارندہ ئس مرگ ئنا گواچی و چھار ٹپی مسُر۔
میجر گہرام ودیک پارے کہ بلوچستان اسہ کوزہ مروکو ڈیہہ اسے ہراڑے ریاست تاغت نا زور آ لس الس ئے تینا پن ئنا آجوئی نا خوشی تا مجلس تیٹی خواہفِسہ جہان نا خن تیٹی دز خسنگ نا کوشست کیک ولے بلوچ الس نا نیمہ غان ریاست نا پروگرام تا بائیکاٹ و ایلو نیمہ غان بلوچ سرمچار آتا اسٹ آن پد ایلو جلہو دشمن نا پروگرام تے ایسر کننگ کن اہم ءُ کڑدار ئس ادا کریر۔
او پارے کہ بی ایل ایف نا تاغت الس ءِ و السی تاغت نا زور آ نن ریاست ئے ہر ٹک آ بےسوب کرون و پرغون و تینا شہید آتا دتر تا بیرئے آجوئی نا دروشم ئٹ ہلون۔ بلوچستان لبریشن فرنٹ دا جلہو تا ذمہ واری تے ہرفک۔
