مَش تا شہزادہ

نوشت: ڈاکٹر جلال بلوچ
براہوئی مٹ: نزہت بلوچ

زند اَرا وخت اَرا کسر آ دے، دیر ئے خبر؟

محمد کریم دا سوچ آن ہمینگ دا ہیت ئنا سماء تخاکہ و اونا متمنی ہم اس کہ دا ننا دُوٹی ءِ کہ زند ئے اَرا کسر آ دننگ مرے۔۔۔
محمد کریم مش تا شہزادہ۔
کریم جان ارانگ اُس نی۔۔۔ دا لُمہ حوا ءِ ہرا کہ کریم جان نا وڑو مار ئسے ودی کرے۔۔
لُمہ حوا ولدا توار کرے۔ کریم ارانگ اُس نی؟
کریم مچھ ئنا رخت آتا سیخا ٹی تولوک سوچ آ تیٹی گُم اس، یا شاید خیال آتیٹی پین جہان ئسے نا بابت ئٹ سوچ کننگ اسک۔
لُمہ حوا دا ہیت ئے پُہہ مسکہ کہ دا دہ سال آ سنجیدہ آ چُنا مچھ ئنا رخت ئنا سیخا ٹی انتئے کائک تولِک ہراکان او مزن بند نا مَش تا لڑ ئے اُرک۔

لُمہ حوا مدان مدان آ گام تے اَرفِسہ سوچ آ تیٹی گُم کریم نا کوپہ آ دُو ئے تخا و ہرِّفے، انت تخوک ءِ دا مَش تیٹی ہرافتے نی خوش انگا خن تیٹ ہُرِسہ، نا دا رویہ دا انداز ئے خنِسہ اندن گمان مریک کہ دا مَش تتون نا کُڑمب ءُ سیالی سے۔

خن تیٹی خڑینک آتا سیلاب ہلوک محمد کریم تینا لُمہ نا پاسوئی ہُرا، لُمہ آن مار ئنا خڑینک آک ہُننگ متورہ۔

لُمہ حوا ہرّفے کنا مار انت ہیت اسے نا خن تیٹی خڑینک انتکن؟

محمد کریم پارے ایہن ای ہندا مَش تیٹی ودی مسونٹ ولے لُمہ کنے دُہن لگیک کہ بھاز زوت نہ بیرہ مزن بند بلکن بلوچستان نا کُل مَش تا ہندی جوڑ مروٹ۔ کنے دُہن لگیک کہ ہر پاس آ کسس کنا خف ئٹی پائک کہ کریم بلوچستان نا مَشک نا ءُ و بھاز زوت نا جاگہ مزن بند تون اوار وطن نا اِیلو مَش تیٹی مرو۔

لُمہ بشخندہ کرِسہ ورندی تس کہ مار نی تو ہر وخت ” مزن بند“ ئٹی کُھر خواہفِسہ، ہندا خاطر آن دننگا تُغ و خیالک نے تنگ کیرہ۔ ایہن ہم دا مَش تیٹی رہینگ و ہڑدے دا مَش ئنا درہ آتیٹ ہِننگ آن او نا ہند جوڑ مسُنو۔

محمد کریم پارے نہ لُمہ ! بھاز وخت کنے دُہنو تُغ بریک کہ ای مَش تیٹی اُٹ، توفک کنا کوپہ تیاٹ ءِ و ای مہروان آ سنگت آ تا محفل ئٹی اُٹ۔ و وخت وخت توفک نا توار ہم بِننگ ئٹی بریک۔

اَسہ تُغ ئس دُہنو ہم خنانُٹ ہراٹی گچینو پُچ بینوک، خوش تب ءُ بندغ ئس کنے کاروان نا ساربان جوڑ کرینے۔ داکان پدا خاخر ئس خنیوہ ہراٹی بد شکل ءُ بندغ ہُشنگنگ ءُ۔ ہرافتا خالیت ہُشنگنگ آن پد پین خراب مریک۔ اوفتا دروشم و حلیہ آن دُہن لگیک کہ او دا ڈیہہ ئنا ہندی افس۔

ای دا کُل ندارہ آتے ہُننگ ئٹی مریوہ کہ مَنہ خیسن رنگ ئنا پُچ بینوک بندغ کنا نیمہ آ بریرہ ہرافتا مُہن تیا بشخندہ مریک، ہرافتا زیبائی ئے درشان کننگ کنا وس آن پیشن ءِ۔ او کنا خُڑک آ بریرہ کنے بھاکُر کیرہ، اوکان پد اَسہ زیباؤ خیسُنو پوشاک ئس کنے بینِفِرہ۔ او پوشاک ہندنوس مریک کہ اوڑان نورانی ءُ روشنائی ئس پیشتمک ہرا تیوہ ہند ئے تینا پلویڑ ئٹی ہلیک، ہمو روشنائی تیان کھور تا خن تے رژن ملیک، معذور تے صحت و نزور آتے توانائی ملیک۔ ہمو کَھورک، ہرافتا خَن تا رژنائی ولدا بسُنے، معذور و نزور بندغ آک ہرا کے صحت مند و توانا خننگیرہ، کُل بندغ آک اَسہ یَلہ ءُ پِڑ ئسے نا کنڈ آ کَارہ ہرا ٹی جنگ ئنا دھولک توار کیرہ و دافک ہم اوفتا سنگت جوڑ مریرہ۔ او علم بُڑز کیرہ ہراٹی ای تینا عکس ئے خنِوہ۔

لُمہ حوا ہَرا اَسہ سادہ و خلقی ءُ زالبول ئس اسک، ولے مار ئنا ہیت آتے خاص کر اونا تُغ ئنا کسہ ئے بننگ آن پد خوشی و غم ئنا اوڑدئی زہم آتون خیال ئے درشان کرے کہ مار اگہ دا تُغ گواچنی نا دروشم اختیار کے گُڑا نی عظیم ءُ مسخت ئسے نا کنڈ آ دیمروی کروس، و اسہ دے ئس برو کہ نی راہشون ئس جوڑ مروس۔۔۔ ولے۔۔۔ زند ئنا زیبا غا ہتم تے ہُننگ کن نی زندہ! لُمہ نا توار ڈُبنگ آ و خنک خڑینک آن پُر مسُر۔

محمد کریم پارے لُمہ پار نی انتئے چُپ کریس؟

لُمہ ہیت ئے ٹلِفسہ پارے کہ ہچ نہ دا وڑ ئنا تُغ کُل خنِرہ۔ اینو نی کُھر خوافنگ کن ہنتنس۔ داسہ نی ہِن باوہ نے تنیا مرو، ہِن اونا کُمک ئے کر۔

ہمو نن لُمہ حوا تینا اَرغ شئے محمد ئے محمد کریم نا کسہ و اونا تُغ ئنا بابت ئٹ پاننگ ئٹی اس۔ لُمہ حوا پارے کہ ہندن لگیک کہ ننا مار مَش تا شہزادہ مرو و عظیم ءُ مسخت ئسے کن تینے ندر کرو، ہراڑے اونا بھاز سنگت مرور، او ہموفتون اوار مرِسہ اوفتا جلو ئٹی جارات محسوس کرو۔ او کُل اسہ شیطانی تاغت ئسے نا برخلاف جنگ کرور۔ دے ئس او راہشون ئس جوڑ مرو۔ او دا سفر ئٹ بھلو جاگہ ئس دوئی کرو و اونا تُغ ئنا ہرا گُڈیکو بشخ اوڑان ہندن لگیک کہ او دا کسر ئٹ شہید مرو۔ ہراکان پدا او پین زیات پِنی مرو و بندغ آک اونا کڑد و اونا عمل آن زیمی مرِسہ دا کاروان نا بشخ جوڑ مرِسہ کرور۔

شئے محمد جوانیکا پام ترسا بی بی حوا نا ہیت آتے خف توننگ اس۔ ہراتم بی بی حوا تینا ہیت ئے ایسر کرے، شئے محمد بشخندہ کرِسہ پارے نے انت مسُنے؟ ننا محمد کریم دائسکان چُنا سے و اونا تُغ تے نی گواچن پُہہ مسونُس۔ دا کسہ غاک، جنگ، مَش تے سنگر جوڑ کننگ دا بلوچ راج ئنا دیہاڑ نا بشخ ءِ ہرانگا او ہر وخت ئٹی دا مَش تے تینا ہند جوڑ کرینو و ہنداکان او ہر دژمن آ جلہو کرینو۔ داسہ دا کسہ غال ہر اُرا و ہر مجلس ئٹی درشان کننگِرہ۔محمد کریم ہم تینا سنگت آتیان بِنوک مرو و ہَندا سوچ اونا تُغ و خیال آ تیٹی بننگ ءِ۔ ہندا سوب اون پارہ کہ بندغ ئے ہمرو ماحول ئس مِلے، اونا تُغ و خیالاک ہم ہموہن مریرہ۔ دا کسہ غاک ننا تیوہ چاگڑد نا بشخ ءُ دانا زہم کریم آ ہم تَموو او نے فریشان کننگ کن دُہنو تُغ خنِسہ کرو۔

لُمہ حوا پارے کہ نہ راستین نا کنے دا محسوس مریک کہ دا تُغ گواچنی نا دروشم ئے ہلو۔

شئے محمد پارے ہنت ئس مرو ہُرون تہ، اگہ اونا بخت ئٹی عظیم ءُ مسخت ئسے کن تینے ندر کننگ لکھوک ءِ تو دا اونا خوش بختی مرو، بس دا دعا کرِسہ کر او ہرانگا مرے خوش مرے۔

وخت گدرینگیسہ کرے محمد کریم ہم چُنکی آن ورنائی ٹی گام تخاسس ولے ولدا ہم اونا کاریم بدل متو۔ او داسہ سُہب ئنا مہالو مزن بند ئٹی کُھر ئے خواہفیکہ۔او داسہ ہم سوچ آ تیٹی گُم مسکہ۔ اودے خنِسہ ہندن گمان مسکہ کہ اودے کس ئنا ودار ءِ۔

کُھر خواہفنگ نا وختا ہندن گمان مسکہ کہ اودے مزن بند نا مَشک توار کننگ ءُ، کہ نی مَش تا شہزادہ اُس، نا ہند ہندا مَشک ءُ، بر ہندانگ نا ہند نے آن بیدس ویران تموک ءِ، مونجا ءِ دا جھل، رخت آتا پَن آک پوشکنی آ خَلکنو، چُک آک توار ءِ اِلانو۔ ہندن لگیک جھل و چُر، پوچ و بوٹَو آک، رخت آک، چُک آک کُل نا ودار ئٹی ءُ۔

محمد کریم شام تمنگ تون وے اُست کشی ئٹ تینا کُھر ئے کبین آ گھام تیتون اُراغو ہیسکہ و وار آ وار پدی چَک خلککہ شاید کس خضر وخت خننگے، ولے سراب ہی سراب اسک۔

اَسہ شام ئس محمد کریم کُھر ئتون اُرا ئے سر مس، لُمہ باوہ ئے خوش خنا سوج کرے خیر تو ارے اینو نُما تومکا تا مُہن تا تازگی زیات خننگک؟
شئے محمد پارے کہ نے خوشی نا حوال ئس بنفنگ اُٹ، ولے اول پِڈ ئنا خاخر ئے کھسف اوکان پد تسلی ئٹ تولِسہ ہیت کینہ۔

لُمہ باوہ نا فربانبردار آ مڷ محمد کریم ہرا چُپ تب ئنا بندغ ئس اسک اودے نمن کننگ نا جیرت متو۔ شام ئنا اِرغ آن پد محمد شئے تینٹ ہیت ئے بناء کرسا پارے کہ کنا مار نا نوکری نا بست او بند مسُنے و بھاز زو نی خلیج آ ہِنوس۔

دا ہیت ئے بنِدہ اوڑا گروک ئس تما۔ او ہبکہ لُمہ باوہ نا نیمہ آ ہُرا، مَچہ چُپی آن پد محمد کریم تینا باوہ شئے محمد ئے پارے کہ ابا کن کہ کنا وطن کنا جنت ءِ، ای تینا کُھر ئتون زیات سکون محسوس کیوہ۔ اگہ کنے پیشن راہی کرورے تو ای پِنوٹ، ٹکر ٹکر مروٹ، کنے اونگی ہِننگ نا پاپبو۔

باوہ پارے مار اونگا کاریم کرِسہ نی تینا زند ئے جوڑ کننگ کروس و اُرا نا نیستی ئے ہم چُھٹفنگ کروس۔ دا ہیٹ میڷ تیٹ بروکا وخت ئٹ انت دوئی کننگ کروس۔ انت دا کاریم آن اَسہ روشن مستقبل نا اُمیت خلنگ کیسہ۔ ای تیوہ غا زند ہندا کاریم ئے کرینُٹ۔۔ داسہ ہُر ! تینا چُنا تے تعلیم ہم تننگ کتوٹ۔ انت نی ہم ہندا خواہِسہ کہ نا چُناک ہم نا وڑ اسکول نا مون ئے خنپس۔

اماں حوا مہر ئٹ مار ئنا کاٹم آ دُو ئے تخِسہ پارے کہ مار نی ہِن کنے خبر ئے کہ نا جتائی بھاز کبین مرو ولے ولدا ہم دا خواہِوہ کے نی ہِن و ہُر اگہ نے لگا کہ نی دا کاریم آن فائدہ ہرفنگ کننگ کپیسہ تو ولدا بریس۔

محمد کریم تیوہ نن خاچِسہ دامون ہیمون مرِسہ کرے۔ اودے مزن بند، ساہجی، دڑامب، زامران، کلبر و وطن نا ہر مَش، جنگل و میدان نا یات تنگ کریکہ، نن ئنا نیمہ آ دامون ہیمون مرِسہ تُنگان ہنا۔

سُہب ئنا مہالو لمّہ حوا محمد کریم ئے تُغ آن بش کننگ کن اونا خُڑک آ بس گُڑا خنا کے مار تُغ ئٹی ہیت کننگ ءِ، نت دو تے سُرفنگ ءِ، خید آن چڑوک ءِ، ہندن لگیک کے کس ئسے تون جنگ کننگ ءِ۔

لُمہ تینا فریشانی ئے ڈھکِسہ اودے بش کرے۔کریم ہراوخت لُمہ نا نیمہ آ ہُرا پارے ای اَرانگ اُٹ؟

لُمہ ہریفے انت مسُنے مار؟ لگیک کہ خرابو تُغ ئس خنانُس۔

محمد کریم پارے ہان اماں ای خننگ اسُٹ کہ اَسہ بھاز بھلو اژدھا ئس مزن بند نا مَش تیٹی خاخر کشنگ ءِ۔ نن مَنہ سنگت اوڑتون مون تننگ اسُن کہ نی کنے بش کریس۔

مَنہ دے آن پد محمد کریم سفر کن سر ہلک۔ او خلیج آ ہِنا، ہمونگا مزوری بناء کرے، پیسہ تو رسینگاکہ تہ ولے بلوچستان نا یات، بلوچستان نا مَش تا یات، اودے ہروخت تنگ کریکہ۔ و اودے ہر وخت محسوس مسکہ کہ بلوچستان نا مَشک اودے توار کیرہ، ہندا خاطر آن او مونجا مسکہ۔ ہمو مَشک ہرافتیان بیدس کریم تینے تنیا و یکہ محسوس کریکہ ہموفتے ٹی بلوچ آزاتی دوست آک ٹھکانہ جوڑ کریسُر۔ دا حالیت آ تیٹی کریم نا بے جاراتی پین ودِسہ کرے ہندن دے ئس او خلیج ئے الیسہ بس۔

او خوش اس، اودے یخین اس کہ وطن نا مَشک کنا ودار ئٹی ءُ۔ مَش تا دُہنا شہزادہ آ تیکن امریکی نوشتہ کار ڈاکٹر سیوس پائیک کہ ” نی عظیم آ ہند آ تیا کاسہ، اینو نا دے ءِ، مَشک نا ودار کننگ ءُ۔۔۔ گُڑا تینا کسر آ ہِنبو۔“

او داسہ مَش تیٹی جہی مننگ اس ہرافتیان بیدس اونا زند سرجم الو۔ دا ہمونا کسر اسک، ہرا نا تُغ تی او چُنکی آن خناسس داسہ وخت بسس کہ او تینا تُغ تا تعبیر ئے ہم خنے۔

و ہندن اسہ دے ولدا او تینا دیار نا زیارت ئے کرے۔اینو اونا خوشی نا ہچ کچ الوکہ، او مزن بند ئے تینا خن تیٹ ہُننگ اسکہ، او خوش اس و تینتو تینٹ ہیت کرسا پاننگ اس کہ کنے داسا تینا جاگہ غا ہِننگ آن کس توننگ کپک۔

بلوچستان ئٹی آجوئی خواہوکا گلی گلی پھیری کریرہ، بندغ آک اوفتا مسخت و اوفتا حالیت آ تیان واخب اسُر۔ داسہ آجوئی نا توار ہر نیمہ آن بِننگ مسکہ۔

محمد کریم ئے لگا کہ اونا چُنکی نا تُغ اندا مد ئٹ اس، مَش تے ہند جوڑ کننگ، مہروان و پرخلوص سنگت آتا اواری، سُم تا توار۔۔۔

دے ئس محمد کریم مزن بند آ چکر خلنگ کن ہِنا۔او اَسہ جھل ئسے آن گدرینگ ئٹی اس کہ مول کروک، توفک دوٹی مَنہ بندغ اونا کسر ئے توریر و سوج کریر کہ اَرانگ ہننگ اُس۔

محمد کریم بشخندہ کرِسہ پارے دا تو کنا اُرا ءِ، کنا اُراٹی کس کنے آ سوج کننگ ءِ کہ اَرانگ ہِننگ اُس؟

سلاہ بند بندغ آ تیان اسٹ ئس محمد کریم ئے چائیس، ارے دا تو ہمو شوان محمد کریم ءِ ہرا مالو ہندا ہند ئٹی کُھر خواہیفیکہ، مُسہ چار سال مُست خلیج آ ہِنا۔۔۔

محمد کریم بشخندہ کرِسہ پارے ہان ولے داسہ ای ولدا بسونُٹ، کنا زند دا مَش تیان بیدس سرجم اف۔

محمد کریم اوفتان سوج کرے کہ انت نُم سرمچار اُرے؟

او پاریر ہان۔

محمد کریم اوفتان سوج کرے انت ای نُما سنگت جوڑ مَننگ کیوہ؟

اوفتان کس پارے کہ دا کسر بھاز کبین ءِ، تینا تیان مُر مروس، ساہ و مال ئنا قربانی تروئی تمو، دزگیر مننگ ئٹ دا زندان آ تیٹی (کلی کیمپ) قیذ مننگ کیسہ، اونگا امرو اذیت تیرہ اوفتے بننگ آ روح ہم لڑزیک، ہر وڑ ئنا قربانی تروئی تمِک، انت نی قربانی تننگ کن تیار اُس؟

محمد کریم پارے ہئو۔ نُما سنگتی کنا زند ئنا حاصل مرو۔

او مول کروک پارے کہ داسہ نی ہِن و مَنہ دے سوچ کر انتئے کہ دا کسر ارزان اف۔۔۔

نن مَنہ دے آن پد سنگت ئسے نا نیمہ آ راہی کرون، اگہ نے لگا کہ نی دا عمل نا بشخ مننگ کیسہ گُڑا بریس۔

محمد کریم ئے سوچ کننگ نا ہِچ بکار الوکہ، اوڑکن مَش تیا ہِننگ اُرا غاب ہننگ نا بریبر اس ولے ولدا ہم او مول کروکا تا پاننگ آ اُرا نا کنڈ آ رادہ مس۔

اینو او بھاز خوش اسکہ ہمر کہ اودے اونا مزل دوئی مسنے۔

ہراوخت او اُرا ئے سر مس لُمہ حوا اونا مہن آ بشخندہ و سکون خنا سوج کرے کنا مار بھاز خوش خننگِسہ، سوب انت ءِ؟

محمد کریم پارے اماں کنے کنا مزل مِلا۔ کنا تُغ و خیال آک گواچن نا دُروشم ہلکنو۔ اینو ہراوخت ای مَش تیٹی پھیری کننگ اسُٹ، ہمونگا ای سرمچار آ تا ٹولی ئس خناٹ۔ ای اوفتے پاریٹ ای ہم نُم تو اوار مننگ خواہِوہ، او ہئو کریر ولے دا شڑت ئتو کہ مَنہ دے پُھدین آ دماغ ئٹ سوچ کیو بھاز جُوان مرو۔ لُمہ نے کنا اُست ئنا حال آن خبر ءِ۔۔ داسہ داٹی سوچ خلنگ نا انت بکار؟ اینو مَشک کنے توار کرینو ای اوفتا توار آ لبیک امر پاپر؟ ای ہنوٹ انتئے کہ کنا زند مَش تا سنگت آ تون اوار مَننگ آ پورو مرو۔

لُمہ نا خنک خڑینکی مسر ولے او مار ئے بھاکُر کرے، اونا پیشانی آ چُوک ئس ہلک و پارے کہ مار اَسہ لُمہ ئس پریشان مرو ولے نا خوشی نا مُونا ہچ ہڑاند جوڑ مروفٹ۔۔ ہِن مار کنا! اینو اَسہ شیطانی توغت ئس ظلم وبربریت نا ہندنو طوفان ئس جوڑ کرینے ہرانا قہر آن تیوہ بلوچستان ہُشنگنگ ءِ۔ ہِن کہ نا گواچنی آ لُمہ (وطن) نے توار کننگ ءِ، و اگہ اونا توار آ لبیک پاتویس اونا خُمب ئٹی نے جاگہ رسینگپک۔

لُمہ نا زند تروکا ہیت آتے بنیسہ ہندا وڑ کہ اونا عئید مس۔ او خوش اسکہ کہ لُمہ کنے خوشی ئٹ موکل تس۔

عظیم آ لُمہ! سبھاش نا قول ءِ کہ ” نی کنے دلیر ءُ لُمہ ایت، ای نے دلیر ءُ راج ئس ایتوٹ۔“

عظیم و دلیر لُمہ نا دلیر آ مار ہرا بروکا دے تیٹ تاریخ نوشت کرے۔

کس دا یخین کننگ کیک کہ اَسہ شوان ئس اَسہ راہشون نا دروشم ئٹ برو، دا گواچن اسے کہ لس بندغ چائے عالم و فاضل ئس مرے یا چاگڑدی مرتبہ آ بھلو جاگہ سے نا خواجہ مرے اوڑکن دا ہند ئے دوئی کننگ منکن اف، انتئے کہ او لس بندغ مریرہ، ولے محمد کریم اَسہ خاص و جتاؤ ہستی ئس اسک۔ اودے قدرت ودی ہی عظیم او مسخت ئسے کن کریسس۔ او جوڑ مننگ کریکہ ہندا خاطران او راہشون ئس جوڑ مس و اینو نا پدریج گواہ ءِ کہ محمد کریم اَسہ بھلو راہشون ئس اسک۔۔۔

ہمو وخت شئے محمد ئے ہم تینا مار ئنا ارادہ آ تا سماء مس، ولے او عظیم آ باوہ ہم اودے تورتَو، بلکن اوڑکن زادِراہ نا بست و بند ہم او تینٹ کرے۔

دا اِرا ہزار ہشت ئنا ہیت اسے کہ شام ئنا اولیکو پاس آ کس اُرا آن خُڑک برِسہ زور ئس محمد کریم نا پِن ئے ہلِسہ توار کرے، شئے محمد ہِنا ہُرا، بِدر ئس سَلوک اس۔ سوج کرے کہ دَیر اُس دیر تون مِلوئی ءِ نے۔

بِدر آ بندغ پارے محمد کریم اُرا ٹی ارے؟

شئے محمد پُہہ مس کہ دا دَیر اسے۔ شئے محمد اودے اُراٹی بننگ نا پارے۔ اودے تُولیفنگ آن پد شئے محمد تینا مار محمد کریم ئے خبر تس، لگیک کہ نا سنگت نے تینتو اوار دَننگ کن بسُنے۔ ای اودے بیٹک ئٹی تُولِفینُٹ۔ ہِن اونا رہی آ تُوڷ، ای اُرا ٹی اِرغ نا بست و بند کننگ نا پاوہ بریوہ۔

محمد کریم ہراوخت مہمان خانہ آ سر مس بِدر آ بندغ بلوچی دود وربیدگ آ تا رد ئٹ اودے بھاکُر کرے۔محمد کریم اودے چاننگ الو۔ بِدر آ بندغ ئے ہندن محسوس مس کہ محمد کریم کنے چاننگ افک، او ہمر ہیت کرے، محمد کریم ئے مزن بند نا مول کروکا نا توار بس، مارشت آ تیان بےسوب مرسا او ولدا اودے بھاکُر کرے و پارے کہ بشخس، ہمیزدے ای نا مہن ئے خنتویسُٹ ہندا سوب آن مَچہ فریشان مسُٹ کہ نی دیر اُس۔

او پارے کے دُہن مریک داٹی فریشان مَننگ نا ہچو ہیت ئس اف۔۔۔ہیت ئے پین ودیفِسہ او پارے کہ ہان گُڑا پار، انت فیصلہ کرینُس نی؟

محمد کریم بشخندہ کرِسہ پارے کہ ہر کس نا زند دا مَش تیان وہوکا چشمہ آ تیان و جھل و چُر سحر کروکا چُک آ تا توار ئے بِننگ آن بیدس سرجم اف۔ اودے پین انت سوچ کننگ۔

او پارے کہ انت اُرا والا تیان کس ئے حوال تسونُس؟

اُرا والاک چُنکی آن کنا مارشت آتے خنرہ، و اوفتے ہم دُہن لگاکہ دے ئس ای دا مَش تے تینا ہند جوڑ کروٹ، لُمہ ئے ای ہرا وخت حوال تسُٹ او خوشی ئٹ کنے موکل تس و ابا زادِراہ ہم تیار کرینے۔

بدر آ بندغ پارے کنا پِن بیورغ ءِ۔ تینا ہیت ئے برجاء تخِسہ بیورغ پارے کہ محمد کریم نی ہند ئٹی گام تخنگ آن مُست کنا اُست ئے کھٹاس و یخین ءِ نا لُمہ باوہ نا دلیری نا کسہ ءِ بِننگ آ اِیلو سنگت آک ہم نا فرمانبردار مرور۔

محمد کریم پارے ای اَسہ شوان ئسے اُٹ داخسو بھلو ہستی ہراکے اَسہ عظیم او مسخت ئسے کن جُہد کننگ ءُ او انتکہ کنے آن متاثر مرور، اوفتا جند ئنا کڑدار داخس مثالی ءِ کہ اینو ہر بلوچ اوفتا فخر کیک۔ ای مسُٹ اَسہ جاہل،گوار شوان ئس، ای تو دائسکان تیوہ مکُران ئے ہم خنتنُٹ، اَسہ وار ئس مزوری کننگ کن خلیج آ ہننگ مس۔ و داہم بنگنُٹ کہ نُما صف تیٹی ڈاکٹر ہم ارے وکیل و انجینئر ہم، اوفتیٹ واحد کمبر و ڈاکٹر اللہ نذر نا پِن ئے بنگنُٹ، ولے ایلو تا پِن تا ہم کنے خبر اف، و دا ہم بنگُنٹ کہ ننا مند نا دلیپ شکاری ہم سرمچار اسے و بھلو جنگول وڑو بندغ اسے۔

بیورغ ہیت ئے تورِسہ پارے کنے خبر اف۔ شاید او پُہہ مسس کہ محمد کریم حد آن زیات سادہ ءُ بندغ اسے ہرا دا ہستی تا بابت ئٹ بیدس خلیس آن ہیت کیک۔

بیورغ پارے اگہ تیار اُس گُڑا کان۔
دا وخت ؟

ہان گُڑا دا جُوان ءِ، گِڑاس کُن اوکان پد پیشتمِنہ۔

بندر آ بندغ پارے کہ دانا بکار اف شام ئنا اِرغ اَسہ سنگت ئسے نا پارہ غا کنگُنٹ، جُوان مرو کہ نن داسہ تینا کسر آ کان۔

گُڑا چاہ ئس کُنین کان۔ دُہن پارِسہ محمد کریم پیشن پیشتما، دہ منٹ آن پد چاہ ئنا کیتلی تون اوار ولدا بس۔ چاہ کُننگ آن پد محمد کریم اُرا نا بندغ آتیان رُخصت ہلک و بیورغ تون اوار مزل نا نیمہ غا رادہ مس۔

کسر ئٹی سنگت پارے تین کن پِن ئس پار تانکہ نن کیمپ ئٹی نے ہمو پِن ئٹ توار کین۔ دا ننا اصول ءِ ہراٹی نن سنگت آتا اصل پِن و پجار ئے پاش کپنہ۔

کریم نا باء آن بے اختیار پیشتما بہرام۔۔۔

بیورغ بشخندہ کرِسہ پارے جُوانو پِن ئسے۔گُڑا اینو آن نی بہرام اُس۔

سُہب ئنا مہالو او ٹھکانہ آ سر مسُر۔ اوڑے بیست سنگت دائرہ جوڑ کروک تولوک اسُر، اَسہ سنگت ئس چاہ تیار کننگ ئٹی آختہ اسک۔

اوڑے ساڑی سنگت آک مہمان تے بخیر کریر۔ کریم ئے ہندن محسوس مس کہ اینو زند نا تیوہ ڈھانچہ بدل مسُنے۔

اسکاٹ لینڈ نا پنی آ ناول نگار ولیم بلیک پائک کہ ” ہراوخت بندغ و مَشک مِلیرہ تو عظیم گِڑا مریک۔ دا گلی تیٹی ہلہ گلہ کننگ آ مفک۔“

اینو واقعی گِڑاک عظیم مسُر۔ زند ئٹی ہرا کمی رہینگاسُر او پورو مسُر، خوشیک درشان کننگ آن پیشن و چُنکی آن خنوکا تُغک پورو مسُر۔ دننگا موقعہ آ تیا دوئی مروکا جارات و خوشی تا مارشت آک حسد کننگ نا قابل مریرہ۔ ہرافتے درشان کننگ ارزان اف، و اوفتے بیرہ ہمو بندغ محسوس کننگ کیک ہرا مَش تا شہزادہ مرے، ہرادے جنون مرے، ہرا کہنگ کن تیار مرے، ہرا وطن نا دیوانہ مرے۔ بہرام ٹی دا کُل خوبیک ساڑی اسُر۔ دا بہرام ہی اسک ہرا او وخت دا محسوس کریکہ کہ زند ہموتم بھاز زیباؤ کسر ئس اختیار کیک ہراتم بندغ مَش تیٹی تینا گچینا سنگت آ تیتون اوار مرے۔

بہرام آن زیات بھلا او وخت ئنا خوشی تے دیر محسوس کننگ کریکہ، ہندا سوب آن او خوش و صحت مند مسکہ، اونا مہن آ ہر وخت بشخندہ مسکہ، ہندا سوب آن کم وخت ئٹی بہرام کُل ئنا اُست آ بادشاہی کرے۔

کیمپ آ سر مَننگ آن پد بہرام ئے دا محسوس مس کہ خواننگ، نوشت کننگ اخس فائدہ مند مریک، او بھاز وخت اندا خناکہ کہ گیشتر سنگت آک کتاب یا اخبار خوانیرہ۔ ایہن تو بہرام نا مَش تیا تیزی ئٹ لگینگ، ہمر کہ مَش ئنا شیر ئس مرے، نشانہ بازی و دژمن نا برخلاف جنگی محاذ آ اونا دلیری نا وڑو صلاحیت آ تا کُل سنگت آک ستا ئے کریرہ، ولے خواننگ نا وے چائینگی نا سوب آن او فریشان مسکہ۔

اونا فریشانی ئے خنیسہ سنگت ئس سوج کرے بہرام انت سوب ءِ، ای خنیوہ کے نی مَنہ دے آن فریشان خننگِسہ۔

بہرام پارے نہ دُہنو ہچو ہیت ئس اف۔

سنگت پارے پاننگ ٹی ہچ مسئلہ ئس اف۔ مننگ کیک ننے آن کس نا کُمک کننگ کے۔

بہرام سنگت نا نیمہ آ ہُرا پارے کنے خواننگ نا شونقءِ، انت کس کنا راہشونی ئے کننگ کیک۔

سنگت مخِسہ پارے یار انت دا ہم فعیشان مَننگ نا ہیت اسے۔ دُہنو کیہی سنگت آتے ای چاوہ ہرا کیمپ ئٹی خواننگ ئے ہیل کرینو۔ و کنے یخین ءِ کہ نا دا شونق ہم پورو مرو۔

ہمو دے بہرام خواننگ بناء کرے و اِرا مُسہ تُو ئٹی حوصلہ تننگ نا کچ ئٹ خواننگ نا لائخ مس۔

داسہ بہرام فارغ وخت ئٹی کتاب نا سہارہ ہلککہ۔ ہندا سوب ئس کہ سال ئسے آن پد او خواننگ تون اوار نوشت کننگ نا ہم قابل مس۔ داسہ او محسوس کریکہ ہرا کمی اوٹی رہینگاسس او داسہ ہنا پورو مس۔

اَسہ تو سنگت آتیان ہیل کریکہ اِرٹمی دا کہ فطرت نا ندارہ تیان ہم اودے ہیل کننگ نا موقع رسینگاکہ۔ پارہ نہ کہ زمین و آسمان آن جنگل و بیابان، دریا و سمندر، مَشک و ریگستان رہنمائی و ہیل کریفنگ نا گچین ءُ زریعہ مریرہ۔ او ہندن ہیل کرفِرہ ہرافتے ہیل کننگ کن اگہ سد کتاب ہم خوانن مَچہ مریرہ۔

وخت گدرینگِسہ کرے، ہر گدرینگوکا دے ئتو بہرام نا لائخیک گچین مرسا مونی بننگ اسُر۔ بہرام نا اَسہ عادت ئس اس، ہرا دمدرینگوکا بندغ ئے ہم تاغت تسکہ، او اسک اونا بشخندہ کروکا عادت۔ او میدان جنگ ئٹی مسکہ ہرانگا سُم تا توار ئٹی اُست توریک، یا سخت انگا کسر تیٹی اسہ وڑ ئٹ سفر، اونا مہن ئنا دا بشخندہ ہچ کم متوکہ، او اودے داسہ بشخندہ کروئی اسک کہ او تینا مسخت ئے دوئی کریسس، ہرا ہند ئنا است خواہی ئے او چُنکی ٹی کریسس او داسہ پورو مسس، و اونا پورو مننگ ہم ہندن اس کہ یاران غار نا اواری ہم نصیب مس ہرا سنگت آ تیکن تینا ساہ ئے ندر کریرہ۔

دے ئنا روشنائی مسکہ یا شام ئنا تارمئی اوڑکن مَش تیٹی کسر پَٹنگ مشکل الوکہ۔ چُنکی آن شوان نا زند گدریفنگ نا فائدہ آک داسہ مون آ بننگ اسُر۔

تینا ہندا کاریم نا سوب آن اوڑکن مَش تیٹی کسر ئے ہننگ و دِیر پٹنگ مشکل الوکہ، و اَسہ مَش تا شہزادہ کن دا گِڑاک بھاز اہمیت تخوک مریرہ ہراٹی او تینا سنگت آتا گچین کمک کروکا و رکھوکا مرے۔

دے ، تُو، سال گدرینگِسہ کریر و بہرام تینا زند ئٹ گھٹ اس۔ او وختس تینا لُمہ، باوہ، زائیفہ و چُنا تون اوڑدہی کن اُراغا ہناکہ۔ اُرا نا خوشیک تینا جاگہ آ ولے بہرام ئے مَش تا یات تنگ کریکہ ہندا سوب آن مَنہ دے اُرا ٹی گدریفیکہ و ولدا واپس وختس مزن بند وختس ساہجی، وختس دھڑامب، وختس زامران، وختس مشکے و آواران نا کسر ئے ہلککہ، و ولدا تُو تیان پد اچانک شام ئنا پاس آ تیٹی دروازہ ءِ ٹھکفیکہ، مَنہ دے ہمونگا گدریفنگ آن پد ولدا سنگت آ تیتون اوار تینا ہند آ ہناکہ۔ ہرانگا تولِسہ او دژمن آ کاری ضرب خلنگ نا تیاری کریکہ۔

وخت گدرینگِسہ کرے بہرام داسہ او بہرام الو بلکن او لشکری و علمی لائخی تا سیمبل ئس جوڑ مسس۔ تینا ہندا لائخی تا سوب آن او راہشون جوڑ مسس۔ ہرانگا تحریک نا موہکش آک ہم اوڑان صلاح و مشورہ ہلکُرہ۔ و ہندی سطح آ اودے زمہ واری ہم تسوسُر ہرافتے او جوانیکان پورو کننگ اسکہ۔

آہ دے ئس۔۔۔۔ او اژدھا تون مون ترسا، تینا وطن نا خیسن پُچ بینوک (شہیدآتا) سنگت جوڑ مس۔

وخت وخت سوچ کیوہ کاش! ای 22 فروری 2023 نا دے ئے خنپروسُٹ۔

نن مَنہ سنگت تولوک کچاری ٹی آختہ اسُن کہ موبائل آ دشت و مزن بند ئٹی لشکری جارحیت نا خبر برِسہ کرے۔ او پیشیم نا وخت اس کہ دا خبر بننگ اس کہ کوزہ گیر لشکر ہشت سرمچار شہید کرینے، ہرافتا جونک تربت ئٹی لیویز نا حوالہ کننگانو۔

کُل سنگتاک اُست ئے دا تسلی ترِسہ کریر کہ دا سرمچار آتا جونک مفرور مننگ کیک ریاست بیگواہ مروکا بندغ آتے شہید کرینے و اوفتا جون تے لیویز نا حوالہ کرینے۔ ہرا کہ داکان مُست ہم دُہنو گندہ ءُ عمل کرینے۔

آہ! کہ نا گمان آ کس ئس سنگت آ تا عکس آتے راہی کرے۔ عکس آتے ہُننگ آ ہندن لگا کہ دنیا پُھلنگا۔ ننا مَش تا شہزادہ تینا ہفت جانثار آ حزا بلوچ، جلال بلوچ، شہزاد بلوچ، آصف بلوچ، طالب بلوچ،منظور بلوچ و مولابخش بلوچ تون اوار تینا ہند ئٹی دژمن نا ڈرون طیارہ آتا گواچی مسوسُر۔

دا لغور دژمن ئے دا سماء اسک کہ یَلہ آ پِڑ ئٹی بہرام و اونا گوریلہ دستہ ئے شکست تننگ پاڷ ئنا جو ہتنگ نا بریبر ءِ، ڈرون ئے کارمرز کرِسہ او گلزمین نا ہمو ہستی ئے ننے آن جتاء کرے ہرا ہر اُست ئنا ساہ جوڑ مسس۔

کنے یخین ءِ کہ سنگت آ تا ساڑی مننگ ئٹی شہادت نا وختا ہم اونا مہن آ بشخندہ مرو و اونا گڈیکو لوز آک ظہیر الدین بابر نا منقول مرور کہ ” سنگت آ تیتون موت ہم عئید ئنا وڑ مزہ تخیک۔“

او مَش تا شہزادہ اس، مَشک اونا ہند اسُر، ہندن لگاکہ اونا و مَش تا پچ و جان ہ سیالی ءِ۔ اسٹ ایلو آن بیدس سرجم افس۔

اونا ہِننگ آن پد مَشک، جنگل، جھلک، چُر آک کُل مونجا ءُ، ولے اونا دلیری ئٹ گدریفوکا زند و اونا دلیر آ شہادت آ بلوچستان نا مَشک ہم تینا شہزادہ نا مون آ سجدہ مرور۔