بلوچ خوانندہ تنظیم بی ایس او آزار نا چئیرمین درپشان تینا شنگ کروک بیان ئٹی پارے کہ شہید رضا جہانگیر و امداد بلوچ راجی آجوئی نا جہد ئٹی راہشون نا وڑئٹ تینا سیاسی زمہ واری تے پورو کننگ ئٹی اسر ہراتم اوفتے پاکستانی فوج اینو آن یانزدہ سال مُست تربت ئٹی شہید کرے۔ شہید رضا جہانگیر، امداد و اوفتا کیہی سنگت آتے کوزہ گیر فوج ئنا نیمہ آن شہید کننگا ولے اوفتا راجی فکر و جہد ئے اینو ہم بلوچ جہدکار آک منظم انداز ئٹ برجاء تخانو۔ شہید رضا جہانگیر و بی این ایم نا بنجاہی راہشون امداد ئے تربت ئٹی شہید امداد نا اُرا ٹی شہید کننگا۔ شہید رضا جہانگیر و امداد بلوچ سخت انگا وخت ئٹ بلوچستان ٹی سیاسی کاریم تے برجاء تخار ہرا وخت بلوچستان ٹی سیاسی کاریم تیکن سیاسی کاریم کروکا تا جونک خسّنگارہ ولے او بلوچ راجی جہد ئٹی سیاسی کاریم تا ارزشت ئے پُہہ مرسہ اوفتے ہر وڑئٹ برجاء تخنگ آ کاریم کریر و گُڈیکو دم اسکان بلوچستان نا کیہی جہہ تا راجی جہد ئکن سیاسی وڑئٹ جہد کننگ ئٹی اسر۔ رضا جہانگیر و امداد خواری کشوکو جہدکار مننگ تون اوار چائندار و گچینو سیاسی موبلائزر اسر، ہرا کم وخت ئٹی تنظیمی کاریم تے تیوہ کیچ و آواران ئٹی تالان کرسہ بلوچستان ئٹی سیاسی جہد کن کسر ملار۔
او پارے کہ ہمرو راجی تحریک ئس مرے اودے اُلس ئنا تہٹی تینا روتہ آتے سوگو کننگ کن ہندنو سیاسی و فکری راہشون بکار مریک ہرا ویتہ ہنڑز و خُلیس آن راجی مکست ئے اُلس اسکان سر کیر، و تینا کڑد و فکری چائنداری آن اُلس ئے اونا غلامی نا مارشت تیر۔ بلوچ سیاست ئٹی دہنا بھلا کڑد آتا چرجوئی بھاز مرغن ءِ ہرا مُچا بلوچستان ئٹی سیاسی کاریم کرسہ لس مخلوق ئے راجی آجوئی نا جہد ئنا ارزشت آن پُہہ کریر و ریاست نا کوزہ و اونا نسخان آتا حوالہ ئٹ اوفتے ہیل تسر۔ ہرا نا سوَب آن اینو بلوچ ورناک راجی جہد آن پُہہ ءُ و اوٹی اوار مننگ ئٹی ءُ۔ بلوچستان نا مخلوق خاص وڑئٹ ورناتیٹ راجی و فکری چائنداری رضا جہانگیر و امداد بجیر آن بارنگا سیاسی راہشون تا جہد ءِ ہرا تینا جند ئنا زند ئے پد تخسہ راجی گُرج آتیک ورنا تا فکری بنداو آ کاریم کریر۔ سیاسی فکر تخنگ و مخلوق ئٹی اوفتا درشانی نا حق ہر بندغ دوست آ چاگڑد ئٹی غُٹ ئے ارے ولے بلوچستان آن بارنگا کوزہ مروکو وطن ئسیٹ ہراڑے کوزہ گیر ریاست زور و تاغت ئٹ تینا کوزہ ئے برجاء تخانے، اوڑے راجی فکر تخوکا ہر ورنا ریاست کن خطرہ سے۔ رضا جہانگیر ئے ہمو وخت آ شہید کریر ہراتم او تنظیمی کاریم تیکن کیچ ئنا دورہ آ اس۔ ریاست وخت آن فائدہ ہفسہ شہید امداد بجیر نا اُرا آ جلہو کرے ہراڑے رضا جہانگیر و اونا فکری آ سنگت امداد بجیر ئے شہید کریر۔ بھلو کڑد مننگ نا سوَب آن اوفتا شہیدی آن تنظیم و تحریک ئے نسخان رسینگا ولے تاریخ گواہ ءِ کہ شہیدی و قربانی تان ہچّو تحریک ئس نزور متنے بلکہ شہیدی تیان تحریک آک فکری وڑئٹ سوگو مریرہ۔
او ایسر ئٹ پارے کہ شہید رضا جہانگیر نا شہیدی آن تنظیم ئے وختی حساب آ نسخان رسینگا ولے شہید رضا جہانگیر و امداد بجیر فکر ئسے سنبھالاسر اینو بلوچستان نا چُنا چُنا ہمو فکر ئے سنبھالرہ و بھلو کچ ئسیٹ راجی آجوئی نا جہد ئٹی بشخ ہلسہ ریاست کن بلوچستان نا ڈغار ئے تِین کننگ ئٹی ءُ۔ شہید آتا فکری وارث آک اوفتا قربانی و جہد ئے ہِچ وڑئسیٹ پھوک مننگ الّوفس و راجی آجوئی اسکان دا سفر و کاروان ئے پین سوگوی ئٹ برجا تخور۔
