بلوچستان لبریشن فرنٹ نا ترجمان تینا شنگ کروک درشان ئٹ پارے کہ بلوچ سرمچار آک آواران و کیچ ئٹی کوزہ گیر پاکستانی لشکرئے ٹک کرسا جانی و مالی نسخان تسُر۔
او پارے کہ اولیکو جلہو ئٹی بی ایل ایف نا اسنائپر ٹیم سیزدہ اگست نا شام ئنا چار بجہ غا آواران نا ہند نوندڑہ ٹی ڈل شار ئٹی ساڑی دشمن لشکر نا چوکی نا پیشن سلوک کارندہ ئے ٹک کرسا خلکُر۔ جلہو آن پد کوزہ گیر لشکر سرمچار آتا پد ئٹ برسا سرویلنس کیمرہ ئے بال تس،سرمچار آک کیمرہ آ سُمکاری کریر تو دشمن لشکر کیمرہ ئے واپس کرے و بکتربند ئٹ سرمچار آتا پد ئٹ بننگ نا کوشست کریر، سرمچار آک بکتر بند ئے ہم ٹک کریر ہرا نا سوب آن بکتربند ہم واپس کیمپ ئنا کنڈا نرا، ولے بکتربند سرمچار آتا سُمکاری نا پلویڑ ئٹ بس۔
ترجمان پارے کہ ایلو جلہو ئٹی سرمچار آک دوازدہ و سیزدہ اگست نا نیامیکو نن، نُہہ بجہ غا کیچ ئنا ہند بلیدہ، سوراپ ئٹی ساڑی دشمن لشکر نا رکھکوک چوکی ئے بھاز خُڑک آن ٹک کریر۔ ہرا وخت سرمچار آک مورچہ ئے ٹک کریر، مورچہ ٹی مُسہ کارندہ ساڑی اسک۔ جلہو تقریباً نیم گھنٹہ اسکان ترندی ئٹ برجاء سلیس، جلہو ئٹی دشمن لشکر نا اِرا کارندہ خلنگا اسہ کارندہ ئس ٹپی مس، دا جلہو ئٹی سرمچار آک بھلا و خودکار سلاہ تے کارمرز کریر۔
او پارے کہ بی ایل ایف نا سرمچار آک بلوچستان نا جتا جتا ہند آتیٹی اسکول آتا دورہ کریر و اسکول آتا خوانندہ تیان ابید ٹیچر و ہیڈ ماسٹر تیتون اواردہی کریر و پن ئنا چھانڑدہ اگست نا مجلس آتا بابت ئٹ پمفلیٹ بشخار۔ دا جہد ئٹی بلوچ الس بے کچ قربانی تسنے و دا قربانی تا بیر ئے بلوچستان نا آجوئی نا دروشم ئٹ ہلنگ مرو۔
او ایسر ئٹ پارے کہ بلوچستان لبریشن فرنٹ دا جلہو تا ذمہ واری تے ہرفک و قول کیک کہ دشمن لشکر و اونا کُمکار آتے بلوچ سرزمین نا آجوئی اسکان ٹک کرون۔
