بلوچ یکجہتی کمیٹی نا ترجمان تینا شنگ کروک بیان ئٹی پارینے کہ درو مستونگ ئٹی تربت نا ہندی ورنا و ڈی سی پنجگور، زاکر بلوچ، و آواران ئٹی معصوم آ چُنا ستارہ شبیر نا خون ئنا مذمت ئے کینہ۔ زاکر بلوچ و ستارہ شبیر نا خون بلوچستان ئٹی برجاء کشت و خون ئنا ہمو چرجوئی ءِ ہرا تدوکا ہفت دہک آن برجاء ءِ، و داٹی براہ راست ہمو تاغت آک تُد ءُ ہرا ہر بروکا دے بلوچ ورنا تا جشوک جون تے خسنگ آن ہلیس دروغ ئنا مونتس آتیٹ اوفتے کھسفنگ ئٹ اوار ءُ۔
او پارے کہ بلوچستان ئٹی دا بربریت و زوراکی نا سوب آن ہڑدیئی بنداو آ کوہ سلیمان آن ہلیس مکران اسکان ہر اُراٹی ماتم ءِ۔ داسا تدوکا ہفتہ بلوچ راجی مُچی ٹی شہید کننگوک مُسہ بلوچ ورنا تا دتر خُشک متنے کہ درو ولدا معصوم آ چُنا ستارہ شبیر و ورنا زاکر بلوچ نا جونک رسینگار۔
دا وختا بلوچستان اسہ بندغی المیہ ئسے آن گدرینگ ئٹی ءِ، و بلوچ راج تیوہ زنک کشی تون مون تننگ ءِ۔ بلوچ یکجہتی کمیٹی بندغی حق آتا تنظیم آتون اوار اقوام متحدہ آن خواست کیک کہ دا زنک کشی ئے توننگ و لکھ آ بندغ آتا زند آتے رکھنگ کن دمدستی کڑد ادا کیر۔
