بلوچ یکجہتی کمیٹی نا کاروان گْوادر آن نوشکی ئے سرمس ہراڑے شہید اصغر خان اسٹیڈیم ئٹی راجی مُچی نا شہید آتا یات ئٹ دیوان ئس اڈ تننگا، دیوان آن گڈ کاروان کوئٹہ کن پیشتما و کوئٹہ ٹی سریاب روڈ آ شاہوانی اسٹیڈیم آ دیوان اڈ تننگ مس۔
نوشکی و کوئٹہ نا مخلوق ایلو شار تا ڈول ہزار آتا کچ ئٹ دیوان تیٹ بشخ ہلکر ہراڑے نرینہ آتون اوار خاص وڑ ئٹ زالبول تا بھلو کچ ئس اوار اس۔
راجی مُچی نا شہید آتا یات ئٹ مروکا دیوان تیٹ بی وائی سی نا راہشون ڈاکٹر ماہ رنگ بلوچ مخلوق آن راجی سوغند ہلک، اندن دیوان ئٹی نعرہ ہم خلنگ مس و بیگواہ غا بندغ آتا آجوئی نا خواست ہم کننگا۔
نوشکی ٹی بی وائی سی نا راہشون ڈاکٹر ماہ رنگ بلوچ دیوان ئٹی تران کرسہ پارے کہ ننے دا راجی سیوتی و اواری ئے تینا زند ئنا ہر گام ئٹ برجاء تخوئی ءِ۔ ننا راجی تاغت ئے غُٹ آن زیات تین پہ تین نا جھیڑہ آک نسخان تسّنو۔
اونا پاننگ اس کہ قبائلی جھیڑہ آتیٹ ننا ہزار آ بندغ آک خلّنگانو، ننا ہزار آ اُراک ویران مسّنو۔ داسا وخت بسنے کہ ننے تین پہ تین نا غاو آتیان پیشتموئی تمّو۔ دا قبائلی جھیڑہ آک قدرتی مفسہ و نئے ننا بندغ آتے تین پہ تین جنگ کننگ و کھئنگ نا شوق ءِ بلکہ ننا اُرانا چک و تاڑ آتیٹ بِدر تا دُو مریک، او ننا چُھنکا چھنکا ویل و اختلاف آتیان فائدہ ہفسہ ننے تین پہ تین جنگ تیرہ۔
ڈاکٹر ماہ رنگ بلوچ نا پاننگ اس کہ دا انگریز نا وخت ئنا چم ءِ تاکہ ننے تین پہ تین جنگ ترسہ، ننے ونڈ کرسہ ننے آ اڑزانی ئٹ حاکمی کننگ مرے۔ اینو او آرام ئٹ دا کاریم ئے کننگ ئٹی ءُ و نن دا چم بازی ئے سرپند مننگ ئٹی افن بس تین پہ تین تینا دُو تیٹ تینا ایلم تہ خلّنگ ئٹی اُن۔ ولے داسا بس کروئی مرو، داسا تین پہ تین جنگ کروئی اف، داسا دا تین پہ تین نا جنگ آتے ایسر کروئی ءِ۔
او پارے کہ بلوچستان نا شہید آتا قربانی تا سدخہ ئٹ اینو بلوچ اُلس ئٹ چاہنداری بسنے، غُٹ ریاستی زوراکی آن پد ہم مخلوق تینا حق آ سَلوک ءِ۔ شہید حمدان بلوچ نا جان و ورنائی وطن آ ندر مس۔ ایمنی ئٹ مروکا ریلی آ ریاستی زوراکی ننے تینا جہد آن پدی کننگ کپک۔ حق ئنا دوہی کننگ و ظلم ئنا برخلاف اواری ئٹ جہد ئٹی ننا آجوئی ءِ، تینا بروکا نسل آتیکن ننے قربانی تننگ آن پد سَلوئی اف۔
ڈاکٹر ماہ رنگ بلوچ پارے کہ کٹمی جھیڑہ آتے چھٹفنگ وخت ئنا گُرج ءِ، بلوچ راج قبائلی جھیڑہ آتیان پیشتمسہ تینا حق ئکن جہد کے۔
اونا پارے کہ بلوچ راج ئنا نیمہ آن بی وائی سی نا مونا بنّنگ و شہید آتا دتر کن ہزار وار تینا جان تے ندر کین ہم کم ءِ۔
