پنجاب یونیورسٹی ڈیرہ غازی خان آن تعلقداری تخوک بلوچ خوانندہ سعدیہ بلوچ ئے یونیورسٹی آن کشانے۔ سعدیہ بلوچ پنجاب یونیورسٹی ٹی ایل ایل بی نا خوانندہ اسے۔
دا حوال ئے سعدیہ بلوچ چاگڑدی حوالکاری نا تلہ غا ترسا پارے کہ پنجاب یونیورسٹی، لاہور کنے کشنگ نا حکم تسنے ہراٹی کنے آ دوبہ خلنگانے کہ کنتو اوار شرپسند خوانندہ غاک یونیورسٹی نا تلہ ئے ریاستی ادارہ آتا برخلاف خوانندہ آتا زہن آتے خراب کننگ کن کارمرز کرینو و دا ہم پاننگانے کہ کنا طرز عمل تعلیمی ادارہ نا ہاٹی و سالمیت ئے خراب کرینے۔
او پارے کہ دا نوٹس ئے ہامدیکا 2 تُو مُست مروکا برانز کن کننگانے و دا نا شنگ کننگ نا تاریخ 14 جون لکھنگانے ولے کنے دا خط 12 اگست 2024 آ رسینگانے ہرا وخت ای دادے تینٹ ہُننگ کن ہناسٹ۔ داکان مُست کنے چارج شیٹ ہم تننگ متنے تو دا پاش مریک کہ دا راجی مچی ٹی اوار مننگ آن پد ہامدیکا مُست ئنا تاریخ شاغِسہ شنگ کننگانے۔
او پارے کہ داڑان پاش مریک کہ نہ بیرہ ریاست تینا لشکر و کوالخواہ تا زریعت ئٹ راجی مچی ٹی اوار مروکا تے ٹک کننگ ءِ بلکہ تعلیمی ادارہ آک ہم بلوچ خوانندہ آتے ایمنی ئٹ سیاست کننگ نا سزا ترسا ہچو رعایت کننگ افس۔
او پارے کہ اسہ زالبول بلوچ خوانندہ ئس مننگ نا سوب آن کنا برخلاف ہرا نامناسب زبان و لوز آک کارمرز کننگانو او تینٹ ادارہ نا پن ئنا نظم و ضبط و اقدار آ سوالیہ نشان اسے۔ کنا سالانہ امتحان آتیان اسہ ہفتہ ئس مُست دا دانستہ کوشش کنا تعلیمی کیریئر ئے نسخان تننگ و کنا زاتی و اخلاقی کڑد آ جلہو اسے۔ ادارہ ئے بی وائی سی تون اوار ریاست نا دستخط کروک مذاکرات نا پیروی کروئی ءِ۔ پنجاب یونیورسٹی دا معطلی نا چٹی ئے منسوخ کے و تینا دروغ آ دوبہ غا تے واپس ہلے۔
