بلوچستان لبریشن فرنٹ نا جارکش میجر گہرام بلوچ تینا شنگ کروک درشان ئٹی پارے کہ بلوچ سرمچار آک آواران نا ہند کولواہ ٹی کوزہ گیر پاکستانی لشکرئے اِرا جتا ءُ جلہو تیٹی ٹک کرسا ہفت کارندہ مرگ ئنا گواچی و مُسٹ ٹپی کننگ تون اوار سرویلینس ڈرون جہاز آتے ہم بٹیر۔
او پارے کہ اولیکو جلہو ئٹی سرمچار آک دہ اگست نا شام ئنا ہشت بجہ غا گیشکور کولواہ ٹی ساڑی کوزہ گیر پاکستانی لشکر نا کیمپ ئے خودکار سلاہ تیٹ ٹک کریر، جلہو ئٹی دشمن لشکر نا اسہ کارندہ ئس مرگ ئنا گواچی و اسٹ ٹپی مس۔
اونا پاننگ اس کہ اسہ پین جلہو ئسیٹی سرمچار آک دہ اگست آ شام ئنا ہشت بجہ غا ڈنڈار کولواہ ٹی ساڑی پاکستانی لشکر نا کیمپ ئنا خُڑک ہنِسہ اِرا پاسو آن پوسکن و خودکار سلاہ تیٹ ٹک کریر، جلہو ئٹی کوزہ گیر لشکر نا شش کارندہ مرگ ئنا گواچی و اِرٹ ٹپی مسُر، جلہو سی منٹ اسکان برجاء سلیس۔
جارکش پارے کہ جلہو آن پد دشمن لشکر سرمچار آتے پٹنگ کن سرویلینس ڈرون بال تس ولے سرمچار آک وارخواہی آن فائدہ ہرفِسہ ڈرون کیمرہ تے ہم خلکُر بٹیر۔
او پارے کہ تینا فطرت آن بیوس باء تروکا دشمن تینا بےسوبی نا خار ئے لس مخلوق آ کشک ہرا نا پلویڑ ئٹ لس الس بریک۔ دا جلہو ئٹی ہم دشمن لشکر نا مارٹر گولہ اُراٹی تمنگ آن اسہ چُناس ستارہ ولد شبیر شہید مسنے۔
او ودیک پارے کہ بلوچستان اسہ کوزہ مروکو ڈیہہ اسے و الس دا زوراکی نا کوزہ آن نفرت کیک۔ بلوچستان ئٹی چھانڑدہ اگست مون ءُ دے ئسے نا وڑ اڈ تننگک۔ دا سوب مند آ جلہو ئے، بی ایل ایف نا ٹیکنیکل ٹیم، انٹیلیجنس ٹیم، اسپیشل فورس و قربان یونٹ نا کنڈ آن کننگا ہرا پوسکنا وخت ئٹ تنظیم نا لائخی و تنظیم نا ٹیم ورک و تاغت نا درشانی ءِ۔
او پارے کہ بی ایل ایف اسہ السی تاغت اسے ہرا تینا سیاسی مسخت آتے سلاہ بند جہد ئنا دروشم ئٹ برجاء تخانے۔
او ایسر ئٹ پارے کہ بلوچستان لبریشن فرنٹ دا ارٹنگا جلہو تا ذمہ واری تے ہرفک و آجو بلوچستان نا دوئی مننگ اسکان دننگا منظم جلہوک برجاء مرور۔
