آواران نا علاقہ کولواہ ٹی پاکستانی لشکر نا کیمپ آتیا سلاہ بند بندغ آک جلہو کریر۔ جلہو آن گُڈ بے سار آ پاکستانی لشکر تینا مون آبادی تیا سُم کاری کرے ہراڑان اسہ چُناس بیران مس۔
حوال تا ردئٹ کولواہ نا ہند گیشکور و ڈنڈار ئٹی سلاہ بند بندغ آک اینو شام ئنا ہفت بجہ نا وختا پاکستانی لشکر نا کیمپ آتیا جلہو کرینو۔ تومکا جلہو تیٹ لشکر ئے جانی و مالی نسخان رسینگ نا حوال ہم ارے۔
اندن حوال رسینگانے کہ ڈنڈار نا علاقہ ٹی سلاہ بند بندغ آتا جلہو آن گڈ بے سار مروک پاکستانی لشکر ورندی ٹی لس آبادی تیا سم کاری کرینے ہراڑان 4 سالی ءُ چُناس بیران مسنے۔
چُنا نا چاہنداری شبیر نا مسڑ ستارہ نا پن ئٹ مسنے۔
یاتی مرے داکان مالو ہم دنو تدینی مونا بسنے ہراعے سلاہ بند بندغ آک پاکستانی لشکر ئے ٹک کرینو و ورندی ٹی او لس آبادی تیا ارش کرینے و لس مخلوق ئے نسخان تسنے۔
