بلوچستان لبریشن فرنٹ نا ترجمان میجر گہرام تینا شنگ کروک درشان ئٹبپارینے کہ 09 اگست 2024 آ جھل جھاو نا علاقہ تدو کور ئنا ہند آ ہندی ڈیتھ اسکواڈ تون دلیری بہادری ئٹ جنگ کرسا سیکنڈ لیفٹیننٹ شمبین عرف شیھک شہید مس۔
او پارے کہ شہید شمبین عرف شیھک جان ولد نور محمد ضلع آواران نا تحصیل جھاو سوڑ ھیرو گوٹھ ئنا ہندی ئس اسک۔ تنظیم تون اوار مننگ آن مُست او اِرا سال اسکان شار ئٹی رہینگِسہ تنظیم نا دوزواہ ئسے نا حیثیت ئٹ کاریم کریسس، اِرا سال نا خواری و جفاکشی آن پد 15 اگست 2019 آ باقاعدہ تنظیم ئٹی اوار مس۔
او پارے کہ تینا محنت، قابلیت و جفاکشی نا سوب آن بھاز کم وخت ئٹی تنظیم ئٹ بھلو جاگہ ئس ہلک، شہید جتا جتا انگا محاذ آتیٹ بی ایل ایف نا تلہ آن راجی آجوئی کن تینا خذمت آتے سر تس۔ جھاو، آواران، کولواہ، کیلکور و اورماڑہ نا اہم انگا جنگ آتیٹی دشمن ئے سخت نسخان تننگ ئٹی تینا کڑدارئے ادا کرے۔
اونا پاننگ اس کہ راجی جہد اتون مخلصی و خدمت آتا سوب آن شہید نا خاہوت ئے پاکستانی لشکر نا نیمہ آن سخت جبر ئنا گواچی کننگا و شہید نا ایلم ئے ہم زوراکی ئٹ بیگواہی نا گواچی کننگا تاکہ شہید تینا جہد آن مُر مرے ولے او ثابت قدم مرسا دشمن ئے پارے کہ بلوچ راجی غلامی اسہ ناسور ئسے و دا ناسور نا برخلاف بلوچ راج ئنا ہر فرزند تینا ساہ ئے ترسا آجوئی نا جہدئے برجاء تخو۔
ترجمان پارے کہ بلوچ سرزمین نا آجوئی کن ندر مروکا کُل شہید آتے دروت ندر کینہ، راج ئنا بہادر انگا فرزند آک جام شہادت نوش کرسا راج ئے آجوئی نا کسرئے نشان تسنو۔
او ودیک پارے کہ بلوچ راج ئنا مون اسہ غیر مہذب ریاست ئسیتون ءِ ہرا بلوچ راج آ ظلم و جبر ئٹ اوفتے جہد آن خلیفنگ نا کوشست کننگ ءِ۔ دا حالیت ئٹی ورنا تا ذمہ واری ءِ کہ اوفک جہد آجوئی نا بشخ مرسا منظم وڑ ئٹ مونی کار، انتئے کہ تنیا آجوئی راج ئنا پگہ ئے خوشحال کننگ کیک۔
او پارے کہ شہید شمبین ریاستی لشکر و ڈیتھ اسکواڈ تون مونتس ٹی شہید مس، تنظیم نا انٹلیجنس ٹیم ڈیتھ اسکواڈ تا پیدواری ئے کرینے زوت اوفتے اوفتا منطقی انجام اسکان سر کننگ مرو۔
او ایسر ئٹ پارے کہ بلوچستان لبریشن فرنٹ شہید شمبین عرف شیھک ئے دروت ندر کیک و دوارہ دا قول ئے کیک کہ شہید آتا دتر تا بیر آجو بلوچستان نا دروشم ئٹ ہلنگ مرو۔
