بلوچستان نا ضلع کیچ ئنا ہند بلیدہ آن پاکستانی لشکر و ہندی ڈیتھ اسکواڈ نا کارندہ آک اُرا تیا چھاپہ خلِسہ چھار ورنا زوراکی ئٹ بیگواہ کرینو۔
بیگواہ کننگوک بندغ آتا چاہنداری نصرم پیر بخش، ولید حمید، نزیر اُمید و حنیف اُمید نا پن ئٹ مسنے۔
زوراکی ئٹ بیگواہ کننگوک بندغ آ تا خاہوت آتا پاننگ ءِ کہ ایف سی و ڈیتھ اسکواڈ نا کارندہ آک ننا بندغ آ تے بےقانودی دزگیر کننگ آن گڈ بیگواہ کرینو، اگہ اوفرے زوت پاش کننگ متو تو نن سخت برانز کرون۔
او پاریر کہ نصرم پیر بخش تُوو ئس مُست عقوبت خانہ غا تیان آجو مسس و بیدادی نا سوب آن بھاز ناجوڑ ءِ، ایلو کنڈ آن اونا ایلم حمید و ایلم نا مار صغیر نا تعزیت نا لڑ برجاء ءِ، دُہنی ٹی اوفتے زوراکی ئٹ بیگواہ کننگ ننے زندہ خلنگ نا بریبر ءِ۔
