بلوچ راجی آجوئی سنگر (براس) نا ترجمان بلوچ خان تینا بیان جاری ئس شنگ کرسا پارینے کہ بلوچ الس ئے سرپندی ایتنہ کہ 14 اگست آ پاکستان نا پن ئنا جشن آزادی نا تقریب آتے ٹک کرون۔ ننے باور ءِ کہ بلوچ راج تدوکا وخت آن بار کوزہ گیر نا پروگرام آتیان بے چکار مرو۔ بلوچ سرزمین آ دا پروگرام آک پاکستانی کوزہ نا پیدواری ءُ۔
براس نا ترجمان نا پاننگ ءِ کہ چین کوزہ مروک بلوچستان نا وسائل نا لُٹ و پُل ئٹی کوزہ گیر ریاست پاکستان تون اوار ءِ۔ نن توسیع پسند تاغت آتیا واضح کینہ کہ کوزہ مروک بلوچستان نا اسہ انچ ڈغار آ ہم کس ئے کوزہ کننگ کن الپرون۔ اگہ چین کوزہ مروک بلوچستان ئٹی پاکستانی کوزہ و استحصال ئٹی اوڑدئی آن پِزیر متو تو بلوچ سرمچار آک کوزہ گیر ریاست پاکستان و اونا شریک آتے عبرتی ءُ سبخ ایتو۔ بلوچ سرمچار آک گوادر آ کوزہ نا پاکستان و چین ئنا ارادہ و ڈٹ آتے بےسوب کننگ نا لائخی تخرہ۔
او پاریر کہ چینی نمائندہ غاک بلوچ راج ئے پن ئنا چین پاکستان اقتصادی راہداری ( سی پیک) نا اہمیت ئے پُہہ مننگ نا پاننگ ءُ ولے او تینٹ دا ہیت ئے چرجوئی ئٹ خن آن تیر کننگ ءُ کہ گوادر تون اوار تیوہ بلوچستان اسہ کوزہ مروک ڈیہہ اسے۔ گوادر ئٹی برجاء ڈٹ آک شونداری کن افس بلکہ استحصالی ڈٹ ءُ ہرافتا سرسوبی آن کوزہ مروک بلوچستان ئٹی آبادی نا کچ بدل مرو و بلوچ راج تینا ڈیہہ ئٹ اقلیت ئس جوڑ مرو و تینا راجی ٹیوار، تینا ڈیہہ و وسائل آ اختیار ءِ گوؤ۔
ترجمان ودیک پارے کہ چین بلوچ وسائل نا لُٹ و پل ئٹی پاکستان تون اواری و اونا کمک ئے بند کے تو اوڑتون بلوچ راج ئنا ہچو دشمنی ئس اف۔ چین دا ہیت ئے جوانیکا پُہہ مرے کہ بلوچ تینا ڈیہہ ئنا خواجئی ئے ہچو بدر راج ئسے تفرو و دننگا تاغت آتا برخلاف سخت مزاحمت کرو ہرا کوزہ گیر تون اوار مس یا سِدھا استحصال نا بشخ مس۔
ترجمان پارے کہ چین آن بیدس ایلو ڈیہک ہم بلوچستان ئٹی سرمایہ کاری آن دو کشیر، بلوچستان ئٹی سرمایہ کاری ہمو وخت منکن مننگ کرو ہرا وخت بلوچ راج تینا آجو آ ڈیہہ ئنا خواجہ تینٹ مرو و ڈنی سرمایہ کاری نا نوعیت تون اوار ”بلوچ راجی سالمیت” نا فیصلہ نا وس تخو۔
براس نا ترجمان پارے کہ بلوچ راج ئنا خواجئی و وس ئے پُھلیسہ ہرا ڈٹ بندیک مرور او بلوچ راج ئنا مفاد آتا برخلاف مرو، اندن جہانی اصول آتیان چپ ہم مرور۔ ماحولیاتی بدلی نا دا دور ئٹ دا ڈٹ آتا ماحولیات آ ہم منفی زہم تمک ہرا بلوچستان ئٹی تباہی نا سوب مریرہ۔ اندا سوب آن بناء دے آن براس دا ڈٹ آتا برخلاف سخت مزاحمت کننگ ءِ۔
ترجمان بلوچ خان پارے کہ براس نا کُل سرمچار آتے پنت تننگک کہ کوزہ گیر پاکستانی ریاست نا پروگرام آتون اوار گوادر ئٹی استحصالی ڈٹ و استعماری مسخت آتے بےسوب کننگ کن اوفتیا جلہو کیر۔ دا ڈغار بلوچ راج ئنا ءِ و دانا آجوئی و رکھ کن بلوچ سرمچار آک کاٹم تے تلف آ تخانو۔
