حوال تا رد ئٹ بلوچستان نا ضلع ڈیرہ بگٹی نا تحصیل سوئی ٹی حاجی نصیر پٹرول پمپ آن خُڑک ایف سی کارندہ ئس چُنا ئسے برمتہ کننگ نا کوشست کرینے ہرادے ہندی بندغ آک ہلکنو۔
چُنا نا باوہ نیاز محمد بگٹی نا پاننگ ءِ کہ تحصیل بازار آن خُڑک دا بندغ چُنا ئے ہلکسس و اونا نَت دُو تے تفنگ اس کہ خوش بختی ئٹ ہمو کسر ئٹ بندغ ئس ہِننگ اس ہرا اودے خنا۔
او بندغ ایف سی کارندہ ئے ہلک و توار توار کرے و بازار نا بندغ آک مُچ مسُر و خُڑک ئٹ ساڑی ایف سی کارندہ غاک ہم ہموڑے سر مسر۔
برمتہ کروکا ایف سی کارندہ تون تینا چاہنداری ئے کرے کہ ای ایف سی آن اُٹ کنا تعلقداری 103 ونگ آن ءِ، ہمو وخت ہند آ سر مروکا کارندہ آک زوراکی ئٹ برمتہ کروکا کارندہ ئے یلہ کریفیر و تینتو اوار چوکی آ دریر، و زرہ ئسے آن پد ایف سی نا ونگ کمانڈر ہم سر مس۔
ہندی بندغ آتا رد ئٹ برمتہ کروکا کاردندہ ئے پولیس نا دوٹی تننگ نا جاگہ غا ایف سی اودے تینتو اوار سوئی چھاؤنی آ درے۔
یاتی مرے کہ سوئی ٹی ہندا دے تیٹ چُنا تے برمتہ کننگ نا کیہی تُدینیک مونا بسنو، و پاننگک کہ برمتہ کروکا پیشن آن بروکو بندغ ءُ۔
