بلوچستان ٹی ڈغار تیا کوزہ و سامراجی ڈٹ بندی تیان بُھس کاری مننگ ءِ۔ بی این ایم
بلوچ نیشنل موومنٹ نا بنجاہی جارکش پارینے کہ بلوچستان نا بھاز آ جہہ تیٹ سامراجی ڈٹ بندی و ریاستی کوزہ آن مخلوق خْواری تا گواچی ءِ۔ اسہ نیمہ آن سامراجی ڈٹ بندی ‘سی پیک’ نا جوڑ مروکا ایم-8 لنک روڈ مخلوق نا آباد آ ڈغار تیٹ گدرینگنگ ئٹی ءِ تو ایلو کُنڈ آن ریاستی مخ تف سردار و میرک مخلوق نا زمین تیا کوزہ کننگ ئٹی ءُ۔ داڑان نہ بیرہ مخلوق نا آباد آ ڈغارک ہِننگ ئٹی ءُ بلکہ نوکاپ نا کسرک، مُلک آتا دِیر ہتوکا گْوَزاک و بھلا دِیر تا کسرک خراب مسنو۔ ہراڑان سد سال آتان چلوکا خُشکاوہ نا نظام بھس مسنے۔
ایلو پارہ غا بلوچستان خاص وڑ ئٹ آواران ئٹی بلوچ اُلس ئنا باوہ پیرئی آ ڈغار تیا پاکستانی لشکر نا جہی آ لشکر (ٍڈیتھ اسکواڈ) نا کارندہ و پِن ئنا سردار و میرک کوزہ کننگ ئٹی ءُ۔ اوفک مخلوق نا زمین تیا کوزہ کرسہ اوفتے ریاستی کمک ئٹ پین تین نا تینا گچین کروک آ بندغا تیا بہا کیرہ، ولے دا ڈغارک مخلوق نا باوہ پیرئی ءُ میرات ءُ و اوفتا روزگار نا وسیلہ ءُ۔ پاکستانی فوج ہر وڑئٹ چاگڑدی ویل آتیک چم بازی کاریم ئٹ ہتنگ ئٹی ءِ تاکہ بندغ آک دہنا ویل آتیٹ تمّسہ تین پہ تین غاوی مریر۔
او پارے کہ پاکستانی انصاف نا نظام آن اُست پنّوک بندغاتا بی این ایم نا مصالحتی کمیٹی داسکان ہزار آ کیس آتے ایسر کرینے ہرافتے فریق آک منّانو۔ ولے داسا چاگڑد ئٹی ویل ودی کننگ و مچا مخلوق ئے خْوار کننگ کن ایلو چم بازی تون اوار تْرندی ئٹ ڈغار تیا ہم کوزہ کننگ ئٹی ءُ۔
بنجاہی جارکش درشان نا ایسر ٹی پارے کہ دا وڑ ئنا کاریم کروک آک ڈغار تا جوفہ ئٹ ریاستی چم بازی تا رہ ئے ہلّنگ و چاگڑد ئٹی مُری و جھیڑہ ودی کننگ آن تینے بچّفر نہ تو راج اوفتان حساب ہلو۔
