گوادر برانز جاگہ آ راجی سوغندی دیوان آن پد بلوچ راجی مُچی نا قافلہ گوادر آن تربت کن پیش تمانے۔
اینو بیگہ نا چار بجہ آ شہید فدا چوک تربت ئٹی بلوچ راجی مُچی نا شہید آتا یاد ئٹ دیوان ئس مرو۔
بلوچستان نا ساحلی ہند و سی پیک مرکز گوادر ئٹی ہنوکا 12 دوازدہ دے آن برجاء انگا برانز اینو جمعہ نا دے ایسر کننگا۔ برانزیک سوغندی دیوان آن پد قافلہ نا دروشم ئٹ تربت کن پیش تمار۔
ہنوکا دے بی وائی سی نا کال آ گوادر ئٹی بلوچ راجی مُچی نا مُختفی کن اُلس ئنا نیمہ آن چار ہند آتا ریلی کشنگ مس ارا پدی زر ئٹ راجی مُچی نا برانز جاگہ آ برسا ایسر مُسر۔
اینو بیگہ نا چار بجہ آ شہید فدا چوک تربت ئٹی شہداء بلوچ راجی مُچی نا یات ئٹ دیوان ئس مرو۔
دا ریلیک فاضل چوک، جاوید کمپلیکس، شہید حمید چوک و موسیٰ موڈ آن کھشنگ مسُر، ارافتا بھلنی ئے ڈاکٹر ماہ رنگ کننگ اسک ۔
ریلی تیٹی زالبول و چُناتہ تیتون نرینہ و ورنا تہ بھلو کچ ئس اوار اسک ارا راجی مُچی برانز ئٹی اوار مسُر۔
چار انگا ریلی تہ اسک جاگہ آ مننگ آن پد مُچی تون ڈاکٹر ماہ رنگ ہیت کرسا پارے کہ پگہ برانز جاگہ آ سوغندی دیوان مرو اوکان پد گوادر ئٹی برجاء انگا برانز داڑے ایسر کننگءُ و قافلہ نا دروشم ئٹ تربت آ ہنو و چار بجہ تربت ئٹی مُچی نا بناء مرو۔
اونا پاننگ اسک کہ ہڑاند آتیان پد ہم بلوچ عوام تاریخی مُچی ئس اڈ تس، ریاست زوراکی کرسا ہڑاند تخا، ننا ورنا تے شہید کننگا، کیہی ٹپی مسُر، کیہی تے بند کننگا، گوادر نا اُلس جرات و بہادری نا ثبوت ترسا تینا راجی و وطنی فرض ئے پورو کرے ارادے تاریخ ئٹ مُدام یات تخنگءُ۔
استو بی وائی سی نا جارکش پارے کہ حکومتی وفد برانز ئنا خواست آتے منانے۔ اینو برانز آتا عمل مننگ آن پد برانزئے ایسر کرون۔
درشان ئٹ پاننگا کہ ریاست بلوچ یکجہتی کمیٹی تون نوشتی معاہدہ کرینے و اوفتا عمل کننگ کن اسک کمیٹی ئس اڈ کننگ نا پڑو کرینے، اگہ دا خواست آتا اسٹ آ ہم عمل متو بی وائی سی تینا جدوجہدئے برجاء تخو۔ بلوچ راجی مُچی ٹی ریاست ننا مُسہ ورنا شہید و کیہی تے ٹپی کرینے۔ اگہ ننا شہید و ٹہی مروکا ورناتہ ایف آئی آر تے ریاستی ادارہ تہ برخلاف نوشتہ کننگ متو، گڑا دانا برخلاف تینا سیاسی جدوجہدئے پین تیز و منظم کرون۔
