بلوچستان نا دریابی شار گوادر ئٹ بلوچ یکجہتی کمیٹی نا سروکی ٹی تولوک برانز یانزدہ دے آن برجاء، اندن بی وائی سی نا سروکی ٹی کوئٹہ، نوشکے، پنجگور و تربت ئٹی ہم تولوک برانز و ریلی تا لڑ برجاء ءِ۔
گوادر شار ئٹ انٹرنیٹ و موبائل سروس آتیتون اوار دیر ئنا سپلائی ہم بند ءِ۔ شار ئنا تہہ و پیشن نا کسر تا بند مننگ نا سوب آن خوراک و ایلو گِڑا تا نیستی ودی مسنے۔
بی وائی سی تینا تولوک برانز نا درو نا حوال ئے چاگڑدی حوالکاری میڈیا غا شنگ کرسا پارے کہ بلوچ راجی مُچی آ ظلم ئنا برخلاف بنجاہی تولوک برانز دا وخت گوادر ئٹ برجاء ءِ۔ گوادر تولوک برانز ئٹ درو السی دیوان اڈ تننگا ہراٹی بلوچ یکجہتی کمیٹی نا راہشونک و مخلوق نا نیام ئٹ ساڑی آ حالیت آتتون اوار جتا سرحال تیا ہیت و تران مس۔ بلوچ راجی مُچی ٹی اوار مروک آک غٹ ریاستی ظلم و تادی تیان بیدس ہم حوصلہ مند ءُ۔
بی وائی سی نا ردئٹ تدوکا دہ دے آن گوادر تون اوار تیوہ مکران ئٹی قیامت نا ندارہ ءِ، دائسکان گوادر تون اوار مکران نا بھاز آ علاقہ آ تیٹ انٹرنیٹ و نیٹ ورک بند ءِ، مکران نا کیہی علاقہ آتا کسرک ہم دائسکان بند ءُ ہرافتا سوب آن کُننگ نا گڑا و دوا تا نیستی ودی مسنے۔ داڑان بیدس گوادر ئٹ دیر نا سپلائی ہم بند کننگانے۔ اوفتا پاننگ اس کہ گوادر ئٹ بلوچ راجی مُچی آ ظلم و تادی نا برخلاف دا وخا گوادر آن بیدس شال، نوشکے، پنجگور و تربت ئٹ ہم تولوک برانز آک برجاء ءُ۔
ایلو پارہ غان بلوچ یکجہتی کمیٹی پنجگور نا تولوک برانزحق دو تحریک نا کماش ملا فرہاد و ایلوفتا سروکی ٹی ڈپٹی کمشنر پنجگور آفس نا مونا بنجاہی کسر آ برجاء ءِ۔ تولوک برانز ئٹ اوار مروک آتا ردئٹ برانز بنجاہی کال اسکان برجاء مرو۔
اندن تربت ئٹ ہم تولوک برانز برجاء ءِ۔ درو تربت تولوک برانز ئٹ ”بلوچ راجی مُچی آ تادی و ساڑی آ حالیت“ نا سرحال آ سیمینار ئس اڈ تننگا۔ ہراڑے سیاسی، چاگڑدی و ادبی تپہ آتون تعلقداری تخوک جتا بندغ آک تران کریر۔ تران کروکا بندغی حق آتا برجاء لتاڑ و بلوچ راج ئتون مروک ناروا روشت آ روشنائی شاغار۔
ایلو پارہ غان کوئٹہ ئٹ ہم بلوچ یکجہتی کمیٹی نا سروکی ٹی تولوک برانز برجاء ءِ، تولوک برانز ئٹ اوار مروک آک میڈیا تون ہیت کرسا پاریر کہ پرایمن برانز کن حوصلہ مند اُن، اوفک گپ و تران نا وخت آ دزگیر کننگوک بندغ آتا دمدستی یلہ کننگ نا خواست کریر و ریاست آ زور شاغار کہ او اوفتا خواست آتے پورو کے و بلوچ راج ئنا برخلاف ظلم ئے ایسر کے۔ اوفتا پاننگ اس کہ انصاف نا فراوانی و بلوچ الس نا حق آتا منّنگ اسکان تولوک برانز برجاء مرو۔
