اِرا دے ئٹی بلوچستان آن خوانندہ آ تا خودکشی نا اِرا تُدینی رپورٹ مسُنے۔
پسنی نا ہند سردشت کلانچ آن میٹرک نا خوانندہ، صمد نا مار جنید لخ ٹی چِھل شاغِسہ خودکشی کرینے، واہم خودکشی نا سوب سما تمتنے۔
حوال آ تا رد ئٹ خودکشی نا تُدینی سئے شمبے نا دے شام ئنا وخت مسنے، تُدوکا دے بلوچستان نا بنجاہی شار کوئٹہ ٹی تُربَت نا ہندی خوانندہ چراغ بلوچ جامعہ بلوچستان ہاسٹل نا کوٹی ٹی گمانی وڑ ئٹ لخ ٹی چِھٹ شاغِسہ خودکشی کریسس۔
بلوچستان ئٹی خودکشی نا تُدینیک اَسہ بیم تروکو دروشم ئس ہلکنو۔ ہردے خودکشی نا تُدینیک رپورٹ مننگ ءُ۔ داکان مُست بیست و ہفت جولائی آ ہم ضلع کیچ ئنا ہند ئٹی اَسہ کیس ئس رپورٹ مسس، ہراڑے حاجی محمد عمر نا مار ناصر، دشت شولیگ نا ہندی دُرست مفروک سوب آن خودکشی کریسس۔
