بلوچ یکجہتی کمیٹی پاکستانی فوج ئے ورندی ترسہ پارینے کہ پراکسی و پیشن نا زر ہلنگ ننا نہ بلکہ نا کاریم ءِ۔ فوج بلوچ اُلس ئنا ایمنی ئٹ مروکا جہد آن خُلینگ ئٹی ءِ۔
یات مرے کہ درو پاکستانی فوج ئنا شعبہ تعلقات عامہ (آئی ایس پی آر) نا ڈائریکٹر جنرل (ڈی جی) لیفٹننٹ جنرل احمد شریف چوہدری پریس کانفرنس ئٹی دوبہ خَلکس کہ بلوچ یکجہتی کمیٹی دہشت گرد و ڈوہدار تا پراکسی اسے۔
بی وائی سی نا جارکش پارینے کہ پاکستانی فوج ئنا بی وائی سی نا برخلاف پریس کانفرنس دا ہیت ئے پھاش کیک کہ فوج بلوچ الس نا زور و ایمنی ئٹ مروکا جہد آن خُلیک۔ سیاسی و بندغی حق آتا جہد ئنا برخلاف ریاستی فوج ئنا پریس کانفرنس تینٹ دا ہیت ئنا اکرار ءِ کہ ریاستی فوج سِدھا بلوچ نا زنک کشی و بندغی حق آتا لتاڑ کرینے۔
اونا پاننگ ءِ کہ ننا اولیکو دے آن ہندا ہیت مسنے کہ ریاستی فوج و اونا ادارہ آک سِدھا بلوچ زنک کشی کنّنگ ئٹی ءُ، و بلوچستان ئٹی بندغی حق آتا لتاڑ کننگ ئٹی ءُ۔ اینو ہزار آتا کچ ئٹ مخلوق بلوچ زنک کشی و بندغی حق آتا لتاڑ نا برخلاف کسر تا پیشتمانے و بلوچ زنک کشی ئے چھٹفنگ نا خواست کننگ ئٹی ءِ، تو ریاستی فوج بلوچستان ٹی بندغی حق آتا لتاڑ ئے بند کننگ نا و بلوچ زنک کشی ئے ایسر کننگ نا جہہ آ ایمنی ئٹ رہینگوکا سیاسی جہد ئنا برخلاف پریس کانفرنس کننگ ئٹی ءِ ہرا ننا فکر ئنا و اونا تینا ڈوہ ئنا مننگ نا درشانی ءِ۔
درشان ئٹی پاننگا کہ نن فوج ئے بٹنگنہ کہ او اسہ نیام ئنا جماعت یا بندغی آتا تنظیم ئسے نا وسپہ ئٹ اسہ پٹ و پول کروک کمیٹی ئس جوڑ کے، ہرا ریاستی فوج ئنا بلوچ یکجہتی کمیٹی آ خَلوکا دوبہ آتا جْوانی ئٹ پٹ و پول ئے کے۔ اگہ اونا خَلوکا دوبہ آتان اسٹ ئس ہم پھاش مس تو نن پاکستان و مُچ دنیا نا عدالت آتا بنّنگ کن تیار اُن۔ ولے اگہ دوبہ آک پھاش متوس تو پاکستانی فوج بلوچ زنک کشی نا اکرار ئے کرسہ تینا سزا کُننگ کِن مونا برے۔
جارکش پارے کہ نن سرپند مرینہ کہ ریاستی فوج ئنا اسہ السی سیاسی جہد ئسے نا برخلاف پریس کانفرنس بلوچ یکجہتی کمیٹی تون اوار داڑے نا غُٹ محکوم راج آتا جہد ئنا اکرار ءِ کہ پاکستان ئٹی جمہوریت، آئین، و قانود اف بلکہ داڑے اولیکو دے آن فوج ئنا بھلائی ٹی آمریت و فاشزم چلیرہ۔ پاکستانی فوج ئنا کاریم رہینگانے کہ دا خطہ ٹی او راست انگا سیاسی جہد آتے پد بٹنگ کن پیشن نا ایجنٹ، ڈن ئنا زر کُنوک و غدار نا لوز آتیٹ چُپ کرفنگ نا کوشش کرینے۔ ولے فوج دا ہیت ئے پُہہ مننگ ئٹی اف کہ دا نوزدہ سد و ہفتاد اف کہ او دروغ آتیٹ مخلوق و پیشن نا دنیا ئے ریفو۔
