بلوچستان نا دریابی شہر گوادر پدی زر ئٹی بلوچ یکجہتی کمیٹی نا کنڈ آن سیمینار “Rements of resist final Echoes” نا سرحال آ اڈ تننگا ہراٹی برانزی تا بھلو کچ ئس اوار اس۔
ہموخت آ ڈاکٹر ماہرنگ بلوچ، سمی دین بلوچ و سبغت اللہ بلوچ تران کرسا پاریر کہ راجی مچی نا پڑو چار تُو مُست کننگاسس، راجی مچی نا اڈ تننگ کن صوبائی حکومت تون اوار ضلعی انتظامیہ ئے ہم پاننگاسس۔ راجی مچی تیوہ غا اسہ پر ایمن و جمہوری جُہد ئنا لڑ اسے، ولے ریاست ہڑاند سلفیسہ بلوچ اُلس ئے ریاستی راہبند و قانود نا تہٹی ہم توار بُڑز کننگ آن توننگ نا بےسوب کوشست کرے، ولے گوادر و بلوچ اُلس ثابت کرسا نشان تس کہ بلوچ تینا سرزمین کن اوار ءِ ننا کل خواست آک ریاستی راہبند نا تہٹی و قانودی ءُ۔
او پاریر کہ بلوچ راجی غلامی نا بدترین دور آن گدرینگ ءِ، سمندر پھلنگیک، ٹرالنگ نا ارش ءِ، ٹوکن نا پِنا روزگار ئے بند کرسا غلامی نا مارشت تننگیک، سرزمین تنگ کننگیک، 70 دراد زمین پُھلنگانے۔
او پاریر کہ بی وائے سی سیاسی بنداو آ جہد ئے برجاء تخو۔
او پارے کہ برانز خواست آ تا مننگ اِسکان برجاء مرو۔ ریاست مذاکرات کننگ ئٹی سوبر افک، اَسہ نیمہ غا مذاکرات و ایلو دے نوشکی ٹی حمدان بادینی ئے سُم تا گواچی کننگا، کراچی ٹی بی وائے سی نا باسک آ تیا کریک ڈاؤن کننگا۔ ایف سی ریاستی جبر کرسا راجی مچی ٹی اوار باسک آتے ٹک کرے 50 آن زیات بندغ ٹپی و 4 شہید مسُنو۔ ہراوخت اسکان ایف آئی آر نوشت کننگتنے، تیوہ بلوچستان ئٹی برانز برجاء مرو۔
