بلوچ یکجہتی کمیٹی نا راہشون ڈاکٹر ماہ رنگ بلوچ گْوادر ئٹی برجاء تولوک برانز ئٹی نیاڑی و نرینہ آتون تران کرے، ہراڑے او سوج آتا ورندی تِس۔
دا دیوان ئٹی ڈاکٹر ماہ رنگ بلوچ راجی مُچی و برجاء غا جہد ئنا بابت ئٹ بھاز آ سرحال آتا زیہا مروکا سوج آتا سرجمی ئٹ ورندی ترسہ پارے کہ گپ و تران ئٹی اسہ جْوانو نُختہ سے آ انتظامیہ نن تون کمک کننگ ئٹی اف کہ ایف سی نا برخلاف ایف آئی آر کننگوف۔ ولے نن نُم چانہ کہ بلوچ راجی مُچی نا قافلہ آک مریر یا تولوک برانز ننا ہرا ایلمک شہید مسر یا ٹھپی مسر یا مالی نسخان مس، او ایف سی نا سُم کاری آن مسّنے، ہندا خاطر آن اودے ایف آئی آر ئٹی ہتنگہِ۔
دا وخت آ ڈاکٹر ماہ رنگ بلوچ نیاڑی تے پارے کہ نم تینا چُنا تا جْوان تربیت ئے کبو اوفتے خوانفبو تاکہ بروکا وخت ئٹی او راجی رکھ و وطن نا خزمت کن کاریم کیر۔ اگہ چنا تا خیالداری متو تو چناک راج و وطن کن ویل مرور، دہن کہ وطن تون غداری، نشہ کننگ، دُزی کننگ و پین دا وڑو چاگڑدی گندئی تا گْواچی مرور۔
ڈاکٹر ماہ رنگ پارے کہ دننگا وخت آتیٹ راجی آجوئی پُھلنگک، زوراور آ راج آک نے آ راج کیرہ، ہمر کہ اوفتا اُست خواہے ہرا وڑ نن تون مننگ ئٹی ءِ۔ ہمرو وخت ئس مرے توفنگی آ اُرا تیٹ جُپسہ چُنا تے اوفتا لمہ آتا خُمب آن کشیرہ لٹ کُٹ کیرہ، سال تِسکان بیگواہ کیرہ یا دروغ ئنا مونتس آتیٹ خلسہ اوفتا جون تے خسّرہ۔
ڈاکٹر ماہ رنگ پارے کہ لمہ آتے اُراتا حاویلی آن پیشتموئ ءِ و نرینہ آتون ہر غم ئٹی اوار سَلوئی ءِ۔ ننے ہم کمک تروئی ءِ گُڑا نن اسہ سرسوب ءُ زند ئس گدریفنگ نا لائیخ مرون۔
او نیاڑی تا جہد ئنا ستا ئے کرے و پارے کہ او اُراتان پیشتنگانو و داسا او دا موقع پرست و بےاتفاقی ودی کروکا خود غرض آتے کھٹینگ کیرہ۔ اگہ نن اوار مرسہ راجی ویل آتے تینا ویل سرپند مرسہ جہد کن پیشتمون تو سرسوبی دا لمہ آتا رَند آتان بُک ہلو۔
ڈاکٹر پارے کہ کنے فخر ءِ ہنوکا نُہہ دے آن برجا آ تولوک برانز ٹی نیاڑیک نرینہ آتان زیات وخت تنّنگ ئٹی ءُ۔ ہرا اسہ جْوانو گام ئسے۔ ہندا وڑ ننے ہر وخت اوار مرسہ تینا مخلوق ئے زوراک آتا زور آن بچفوئی ءِ۔ اوفتان ہرفوئی ءِ کہ او اَرا قانود، اَرا آئین نا وڑئٹ ننا باوہ، ایلم، مار، اَرِہ، سْیال یا اسہ بلوچ ئسے بیگواہ کیرہ؟
یات مرے کہ گْوادر ٹی ‘بلوچ راجی مُچی’ آ پاکستانی فوج ئنا زوراکی نا برخلاف تولوک برانز ئے نُہہ دے مسّنے۔ ریاستی زوراکی آن پد ہم برانز کروکا انصاف و تینا حق آتا خواست آتا سَلوک ءُ۔
