ہپ ءَ لڑزہ مروکا ایف سی تینا کیمپ آن خڑک اُرا سے آ دیسی بمب ئس خسا، تراک ئٹی چُھناس شہید مس۔
حوال تا رِدئٹ چم بازی نا جلہو آن پد ایف سی و ایجنسی زورئٹ مخلوق آن ارمانی ءُ درشان خواہینگ ئٹی ءُ۔
حوال تا رد ئٹ خاران ئٹی ایف سی و ڈھکوک ادارہ آک ایف سی کیمپ ئنا بھلا دروازہ آن دہ فٹ نا مُری آ اسہ اُرا سے آ دیسی بمب ئس خسار ہرا نا سوَب آن اسہ بلوچ چُھنا ئس شہید مس۔
شہید مروکا چُھنا نا چاہنداری علی اکبر نا مار قدرت اللہ نا پِن ئٹ مسنے۔
تدینی آن پد ایف سی تینٹ دا ہیت ئے کرینے کہ بی ایل اے کالج روڈ آ اُرا سے آ جلہو کرینے۔ ولے دا اُرا کالج روڈ آ افک بلکہ ایف سی کیمپ ئنا بھلا دروازہ آن خُڑک ءِ۔ اوکان پد اوفک تینا دتکی ایم پی اے و دلار شعیب نوشیروانی نا کمک ئٹ ہندا خبر ئے تالان کرفینو۔
یات مرے کہ دا اُرا ایف سی کیمپ آن دہ فٹ مُر ءِ ہرانا ہیب ءَ کھیب ئٹ لس مخلوق ہِننگ کپک انتئے کہ دا ایف سی نا ریڈ زون ءِ و غُٹ کسرک بند ءُ۔
ہندا گمان نا درشانی ئے چُھنا نا خاہوت ہم کرینے کہ جلہو نا وخت اوفتا اُرا آن خڑک ہچّو موٹر سائیکل، گاڈی یا بندغ ئس خننگتنے، ہندن بمب ہم ہمو نیمہ آن خسنگانے ہرا کُنڈ آ ایف سی کیمپ ءِ۔
دا تدینی ہموہنو وخت ئسے آ مسنے کہ پاکستانی فوج و اونا ادارہ آک خاران و مُچ بلوچستان ٹی بلوچ یکجہتی کمیٹی نا السی جہد آن خُلینگ ئٹی ءُ۔ او خُلیس آن دا آمخی ئے کرینو۔ اوفتے بھازی آن اندا گمان مسنے کہ اوفتا دروغ کاریم کے ولے اوفتے سما اف کہ بلوچ نا چھنا چھنا دا راستی آن پُہہ ءِ کہ ایف سی آن ہلیس آئی ایس پی آر اسکان فوج دروغ ئنا بڈ ئسے آن ویتہ پین ہچس اف۔
