بلوچستان ٹی بشام نا تیز پِر تیان جھل تا لوڑو و پِھر تیان سینزدہ بندغ بیران مسنے۔
حوال آتا رِدئٹ بلوچستان نا بھاز آ ہند آتیٹ بشام نا بھلو جھمر ئس سَلوک ءِ، ہرا نا سوَب آن شال و پین بیست و دو ضلع ٹی پِھر ئنا گمان ارے۔
محکمہ مُد ئنا رد ئٹ کہ بلوچستان ٹی پِھر دسوکا دا جھمرک شش اگست اسکان مرور۔ ہراڑے خضدار، جھل مگسی، آواران، لسبیلہ، بارکھان، پنجگور، قلات، مستونگ، سبی، موسیٰ خیل، شیرانی، کوہلو، بولان، ہرنائی، نصیر آباد،جعفر آباد، ڈیرہ بگٹی، شال، زیارت، ژوب، قلعہ عبداللہ و قلعہ سیف اللہ ٹی زورکا چِھرک آتون اوار پِھر ئنا گمان ءِ۔ ہندن جہہ جہہ آ زوراکا پِھر تیان جھل و گْوز آتیٹ لوڑو و مَش تا ڈھرنگ نا ہم خلیس ارے۔
حوال تا رد ئٹ بلوچستان ٹی بشام نا دا پِھر تیٹ گِروک آتیان و لوڑو تیٹ داسکان دوانزدہ بندغ کھسکنے و سی و دو داسکان ٹھپی ءُ۔ پِھر تا سوب آن اُرا تے ہم نسخان رسینگانے ہراڑے 263 اُرا تے نساکان مسنے و نوَد و یک اُرا مُچ وڑئٹ تمانو۔
زوراکا پھر تیان سئے سد ءُ دوانزدہ ایکڑ نا فصل، نوزدہ کلو میٹر نا کسر و یک سد و شش مال ئنا کھئنگ نا نسخان مسّنے۔
پی ڈی ایم اے بلوچستان پارینے کہ ویتہ المی آ سفر آن ایہن سفر کننگ و جھل تا خُڑک آ ہِننگ آن بچنگ مرے۔ دا حوالہ ئٹ پی ڈی ایم اے غُٹ زمہ وار ادارہ آتے باخبر رہینگ نا پارینے و اُلس آن ہم خواست کرینے کہ او احتیاط کیر تاکہ نسخان آتان بچنگ مرے۔
ایلو نیمہ آ بلوچستان نا بھازا علاقہ آتیٹ ہورہ گروکی آ پِھرک برجا ءُ۔ ہاوار آ جاگہ آتیٹ لوڑو تان کسرک خراب مسّنو و بھازا علاقہ آتا تین پہ تین نا زمینی حوال بند مسّنے۔
