28 جوالائی آ گوادر ئٹی اڈ ہلوکا ‘بلوچ راجی مُچی’ آ ریاستی زوراکی و سُم کاری تیٹ شہید کننگ نا برخلاف السی تحریک کراچی و تیبہ بلوچستان ئٹی تالان مسّنے۔
گْوادر، نوشکی، شال، تربت و پنجگور ئٹی تولوک برانز برجاء ءِ و کرفیو لگوک ءِ۔
گْوادر ٹی فون و انٹرنیٹ سرووس بند ءِ و ایلو علاقہ آتا ہِن ءَ بر ہم توننگانے، مکران کوسٹل ہائی وے آ فوج سلوک ءِ و کیئی جہہ تا جہی آ ریاستی لشکر (ڈیتھ اسکواڈ) نا کارندہ آک سلوک ءُ ہرا مخلوق ئے نہ شار ئٹی پیہنگ الّیرہ نہ پیشتمنگ۔
گْوادر پدی زر آ برجاء غا تولوک برانز ئے بےسوب کننگ کن شار ئنا دِیر و راشن نا وسیلہ غاتے بند کننگانے۔ تولوک برانز نا چھارمہ کُنڈ فوج ئنا کارندہ غاک سَلوک ءُ۔
دا حوالہ ئٹ بی وائی سی نا پاننگ ءِ کہ گْوادر ئٹی بی وائی سی نا تولوک برانز ہشتمیکو دے ہم برجاء ءِ، ہراٹی ہزار آتا کچ ئٹ مخلوق بشخ ہلکنے، دا امن ئٹ مروکا تولوک برانز انصاف رسینگ اسکان برجاء سَلو۔
اوفتا پاننگ ءِ کہ تدوکا دہ دے آن ریاست گْوادر و مچا مکران ئٹی انٹرنیٹ و موبائل نیٹ ورک ئے بند کرینے و کرفیو خَلکنے۔ غُٹ کسر تے، دکان تِے و بازار تے زور ئٹ بند کرینو۔ ہرانا سوَب آن راشن و دوائی نا گیشتر کمتی ءِ، ہندن گْوادر نا کُنوئی آ دِیر ئے ہم توننگانے۔ ریاست نا دا زوراکی تیان بلوچستان ٹی بندغی بحران ئس ودی مرو۔
بی وائی سی نا پاننگ اس کہ ننے بھاز افسوس ءِ کہ بلوچستان نا دا حالت ئٹی ہزار آ جانک خطرہ ٹی ءُ ولے دنیا دا بربادی ئے خنسہ چُپ ءِ، دا چُپی لکھ آ جان آتا نسخان مننگ کیک۔ توار ہفبو و لکھ آ زند آتا بچنگ ئٹی کمک کبو۔
ایلو نیمہ غا ‘بلوچ راجی مُچی’ آ ریاستی سُم کاری، زوراکی و بیگواہی تا برخلاف نوشکی ٹی بھلا کسر آ تولوک برانز برجاء ءِ۔ ہندن پنجگور و کیچ ئٹی ہنوکا پنچ دے آن تولوک برانز برجاء ءِ، مخلوق بھلو کچ ئسیٹ تولوک برانز آ تیٹ اوار ءِ۔
