گْوادر ٹی ‘بلوچ راجی مُچی’ دھرنا نا وڑئٹ ہفتمیکو دے برجا اے، ہندن شار اسہ وڑ فوج ئنا پلویڑ ئٹی اے و حال حوال نا نظام بند اے۔
دھرنا چوکاتا پاننگ کہ راجی مُچی نا برخلاف زوراکی کننگ آن پد پدی زر نا ہند آ دھرنا برجا اے۔
اوفتا مُستی پاننگ کہ گپ ءُ تران آن پد ہم ریاست بلوچستان ٹی امن ئٹ برانز کروکاتا برخلاف زوراکی کننگ ئٹی اے ہرانا سوَب شہید و ٹھپی مروکاک ودّنگ ئٹی ءُ۔ دا زوراکی امن ئٹ مروکا بلوچ جہد ئے توننگ کن ریاست نا ارادہ ئے پھاش کیک۔ ولے اگہ او سرپندہ مریرہ کہ بلوچ اُلس بنیاتی بندغی حق و تینا جہد آن دُو ہفّو تو او رد ءُ۔ نن دا ظالم ریاست نا زوراکی نا مون آ اسُل شیف مروفن۔
ہندن نوشکی ٹی جمعہ نا دے بلوچ یکجہتی کمیٹی نا گْوادر راجی مُچی نا حمایت ٹی مخلوق نا بھلو کچ ئس ریلی ئس کشا، ہراڑا پاکستانی فوج سِدھا سُم کاری کرے۔ سُم کاری ٹی ہمدان پِنی آ ورنا شہید مس و مسٹ بھاز ٹھپی مسّہ۔ سُم کاری آن پد نوشکی ٹی حالت آک خراب مسّہ و انٹرنیٹ بند کننگا۔
حوال آتا رِدئٹ برانز کروکاتا سُم کاری نا برخلاف بھلا کسر اسٹیشن قلم چوک آ دھرنا برجا مس و گاڈی تا ہِن ءَ بر سلیس و شار ئٹی ہڑتال کننگا۔
جمعہ نا دے کراچی ٹی بلوچ یکجہتی کمیٹی نا اڈ تروکا "بلوچ راجی مُچی” آ پولیس نا زوراکی و قافلہ آتہ توننگ نا برخلاف کراچی ٹی آرٹس کونسل آن کراچی پریس کلب اسکان ریلی ئس پیشتمنگ اس کہ پولیس اوفتا جلہو کرسہ لٹ کُٹ کرے۔
