بلوچستان نا بھازا شار تیٹ ‘بلوچ راجی مُچی’ کن کاریم کروکاتا و بشخ ہلوکاتا برخلاف مقدمہ کننگانے۔
تربت ئٹی پولیس وسیم بلوچ و بلوچ یکجہتی کمیٹی نا ایلو باسک آتا برخلاف بغاوت نا مقدمہ کرینے۔ پولیس اوفتا ریاست نا برخلاف پنتاک بشخنگ و راجی مُچی کن مخلوق ئے یکجاہ کننگ نا دوبہ ئے خَلکنے۔
ہندا وڑ حب چوکی ٹی پولیس نا نیمہ آن کسر تِہ تفنگ، دھرنا تننگ و پولیس آ سُم کاری نا دوبہ ٹی قبائلی راہشون ستار انگاریہ، عارف بلوچ تون اوار بلوچ یکجہتی کمیٹی نا ایلو باسک و راجی مُچی آ ہنوکا نیاڑی و نرینہ آتا مقدمہ کننگا۔
حب پولیس ایف آئی آر ٹی پارینے کہ برانز کروکا گڈانی آن بھلا کسر ئے بند کرینُہ اوفتہ پدی کننگ نا وخت اوفتا خل کاری و سُم کاری آن پولیس نا کارندہ آک ٹھپی مسّنُہ۔
ہندن نوشکی ٹی پولیس شار ئے بند کننگ، برانز ئٹی پاکستان نا برخلاف و آزات بلوچستان نا نعرہ خلّنگ آ بھازا نیاڑی و نرینہ آتا مقدمہ کرینے۔
گْوادر ٹی مروکا ‘بلوچ راجی مُچی’ آ پاکستانی فوج ئنا جلہو آن پد مُچ بلوچستان ٹی داسکان برانز مننگ ئٹی اے۔ پولیس و فوج ئنا کُنڈان برانز کروکاتا اُراتا چھاپہ خلّنگ و ہلّنگ نا ہم بھازا تدینیک مسّنہ۔
یات مرے کہ راجی مُچی آ ریاستی جلہو نا برخلاف برانز کننگ آ داکان مہالو خضدار، شال، بارکھان و خاران ئٹی ہم مخلوق نا برخلاف مقدمہ مسنے۔
ایلو کُنڈا بلوچ یکجہتی کمیٹی ریاست تون گپ ءُ تران کن دا تخانے کہ راجی مُچی آ بروکاتا برخلاف زوراکی بند کننگہ و راجی مُچی کن ہلّنگوکا غُٹ ئے زو ئس یلہ کننگہ۔
ڈاکٹر ماہ رنگ بلوچ پارینے کہ گپ ءُ تران نا نیام ئٹ اگہ مُچ بلوچستان ٹی بلوچ راجی مُچی آ بروکاتا زوراکی کننگا تو نن گپ ءُ تران ئے پد تخون و دھرنا ئے برجا کرون۔
