بلوچستان نا شہر گوادر ئٹی پدی زر نا ہند آ بلوچ یکجہتی کمیٹی نا برانز برجاءءِ، چار شمبے نا شام حکومتی وفد برانز جاگہ آ بس مذاکرات کرے۔
او وخت آ بلوچ یکجہتی کمیٹی نا راہشون ڈاکٹر ماہرنگ بلوچ حکومت تون اوار مروکا مذاکرات آ تا حوالہ ئٹ بندغ آ تے پارے و مذاکرات نا نکات آتے پیش کرے۔
نکات آتا رد ئٹ بلوچ راجی مُچی نا برانزی تہ برخلاف گْوادر تون اوار تیوعہ بلوچستان ئٹی طاقت و بیدادی نا کارمرز کننگ ئے تیوعہ توننگءِ۔
تیوعہ بلوچستان ئٹی راجی مچی نا دزگیر مروکا کل برانزی تے زوت آجو کننگ مرے، بلوچستان نا کل کسر تے ہم زوت ملیر۔
گْوادر ئٹی بندغ آتا اُرا تیا چھاپہ خلنگ و اوفتے تنگ کننگ نا لڑ زوت بند کننگے۔
ڈاکٹر ماہرنگ بلوچ پارے ک مذاکرات نا وخت آ اگہ گْوادر تون اوار بلوچستان نا اَرا ہند آ تیٹی بلوچ راجی مچی نا برانزی تے تنگ یا طاقت کارمرز کننگا مذاکرات ئے توریسہ برانز ئے برجاء تخون۔
ایلو نیمہ آ بلوچ یکجہتی کمیٹی ہنوکا مسہ دے آن شہید فدا چوک آ برانز کننگءِ اراڑے ہنوکا دے حکومتی وفد تون اوار ظہور احمد بلیدی، اصغر رند، ڈی سی کیچ اسماعیل ابراہیم،انجمن تاجران نا رہشونک مذاکرات کریر، بلوچ یکجہتی کمیٹی تینا خواست آتے پیش کرے اَرافتیٹ کل دزگیر باسک آ تا آجوئی، کسر و نیٹ ورک ئے ملنگ،ایف آئی آر نا خاتمہ اوار ءِ۔
حکومتی وفد پارے کہ خواست آتے ہرون و دیمرئی مننگ آن پد بلوچ یکجہتی کمیٹی نا راہشون تیتون حوال کرون۔
