بلوچ آجوئی دوست راہشون اختر ندیم بلوچ تینا اَسہ درشان ئسیٹی بلوچستان ٹی ودی مروکا تدینی تیا پارے کہ حوصلہ، سگ، سیوتی و استقامت مدام مزاحمت نا بنیات مسنو و دیہاڑ دا ثابت کرینے کہ دا جوانیک بھلا تاغت آتے ہم شسکت تننگ کیرہ۔ اینو نن ریاستی زوراکی و ننا مونا بروک چیلنج آتے مون تینا دا یات کننگ المی ءِ کہ آجوئی بلوچ الس کن بیران اسہ تغ ئس اف بلکن دا ننا ناگزیر بخت ءِ۔
بلوچ پجار و بقا نا جہد اَسہ نازرک کسر ئسے آ سر مسنے۔اَسہ نیمہ غا بلوچ الس تینا دود و ربیدگ، مڈی و تینا وجود ئے پچفنگ کن جنگ کننگ ءِ ایلو نیمہ آ نن ریاست نا پارہ غان ظلم و زوراکی نا اسہ بے مثال لہر ئے ہننگ اُن۔ دا ظلم بیرہ بلوچ راج ئنا روح آ براہ راست جلہو ءُ۔
جہد و کوشست نا بلوچ الس ئٹی مسخت و عزم نا پوسکنا جذبہ ئے ودی کیک، ہرا ننے یات ترفیک کہ ننا جہد بے سوَب افک۔ ننا شہیدآتا قربانی و ننا الس ئنا فریشانیک استان دننگوفس۔ او ننے ٹی اسہ خاخر ئس ودی کرینو ہرا ریاستی بیدادی ہچ وخت ہم کھسفنگ کپک۔
چین و او کل راج آتے ہرا تینا سرمایہ کاری و جغرافیائی سیاسی مفادات آتے اہمیت تیرہ، نن دا پانہ کہ بلوچستان نا سالمیت، ننا زالبول آتا شرف و ننا بندغ آتا شرف ننکن پیشن ڈیہی سرمایہ آن زیات ارزشت تخرہ۔ بلوچ الس پاکستان نا ننا سرزمین آ مسلسل قوضہ و استحصال نا گواچی ءُ۔
نن چین تون اوار عالمی برادری آ زور تینا کہ او دا پُہہ مریر کہ بلوچ راج ئنا رضامندی و اواری آن بیدس بلوچستان ئٹی سرمایہ کاری نہ بیرہ غیر اخلاقی ءِ بلکن
غیر پائیدار ہم ارے۔ دا نا قابل قبول ءِ دا ننا حق آ تا خلاف ورزی و آجوئی کن ننا جہد ئے نظرانداز کننگ ءِ۔ جہان ئے منیفنگ مرے کہ ننا بندغ آ تیا ظلم کننگیک گُڑا بلوچ راج چپ مفرو۔
اخیر ئٹ ننا واضح کلہو ءِ کہ بلوچ الس تینا آجوئی، تینا حق و تینا مستقبل کن جنگ کرسا کے۔ نن چہ مروفن و ننے شکست تننگوف۔ او دے مرو کہ بلوچستان آجو مرو و ننا بندغ آ تا قربانی تے ہم قدر نا خن ئٹ ہننگو۔
