ڈپٹی کمشنر گوادر پک کرے کہ ڈاکٹر ماہرنگ بلوچ و بلوچ یکجہتی کمیٹی نا راہشون تیا جلہو کن بروکا بندغ نا تعلقداری پاکستان ٹی قانود نافذ کروکا ایجنسی آن ءِ۔
یاتی مرے کہ ہنوکا دے بلوچ راجی مچی نا وخت آ جلسہ نا برانزیک اسٹیج نا خڑک آن اِرا مشکوک سلاہ بند بندغ ہلکر ہرافتا قوضہ آن اسہ نائن ایم ایم پسٹل، واکی ٹاکی و سم خنار۔
رسینگوکا حوال تیٹ ویڈیو ٹی ملزم پک کرے کہ او پاکستان نا ایم آئی نا بندغ اسے و اودے ڈاکٹر ماہرنگ تون آوار بلوچ یکجہتی کمیٹی نا بھلا تے خلنگ کن راہی کرینو۔
ایلو نیمہ آ ڈپٹی کمشنر گوادر اسہ پریس کانفرنس ئسیٹی پارے کہ راجی مچی نا وخت آ، کمیٹی نا کارندہ ئسے ہلکر و اوفتے واپس تننگ آن منہ کریر۔ ضلعی انتظامیہ مرغنو ہیت و تران ئس کرے ولے کمیٹی نا سیکیورٹی ایجنسی نا کارندہ ئے ننا حوالہ کتنو۔ اوکان پد پولیس ایف سی برانز نا مچی ئے منتشر کرے۔
او دعوی کریر کہ مُچی ئے منتشر کننگ نا وخت آ سیکورٹی کارندہ تتون توفنک الیتو۔ آنسو گیس شیلنگ کرسا منتشر کننگار۔ واہم برانزیک ہراکہ بناء آن پرتشدد اسر، او پاریر کہ اسہ ایف سی کارندہ ئسے خل خلیسہ شہید کریر۔
او پین پاریر کہ ضلعی انتظامیہ راجی مچی کمیٹی نا راہشون تے پرامن برانز کننگ و اوفتے بے قانودی حق فراہم کننگ نا پیشکش کریسر، ولے کمیٹی ضلعی انتظامیہ نا ہیت آتے تسلیم کتنے۔
او دا دوبہ خلکر کہ بلوچ راجی مچی کمیٹی نا باسک آک قانود ئے تینا دوٹی کرسا حکومتی رٹ ئے چیلنج کرینو۔
ڈپٹی کمشنر سمی، صبیحہ و صبغت اللہ نا دزگیری ئے افواہ پارے کہ زالبول تے گوادر راجی مچی نا وختا دزگیر یا ٹپی کننگ نا خبر آک بے بنیاد ءُ۔
ایلو نیمہ آ خنوکاک پاریر کہ لشکر برانز آ جلہو کرسا برانزی تیا سمکاری کرے و برانزی تے ٹپی کرے۔ ڈاکٹر صبیحہ، سمی دین و صبغت اللہ ئے ٹپی کرسا دزگیر کننگانے۔
