بلوچ یکجہتی کمیٹی نا جارکش پارینے کہ دا وخت تیوعہ گوادت ریاست پاکستانی نا بدترین وحشت و درندگی نا گواچی ءِ۔ اینو صحب ئنا دوارہ پاکستان آرمی و ایف سی گْوادر ئٹی بلوچ راجی مچی نا پرامن برانز آ بدترین جلہو کرے، چار کنڈان برانزی جاگہ ئے گھیرہ ٹی ہلیسہ پرامن برانزی تیا سُمکاری نا بناء کریر اَراڑان دائسکان کیہی بندغ ٹپی ءُ ہرافتیٹ زالبول و چُنا ہم اوار ءُ۔ ٹپی مروکا برانزیک دا وخت پاکستانی لشکر نا گھیرہ ٹی ءُ، نہ اوفتے ہسپتال آ دننگ نا اجازت تننگ ءُ و نہ ایمبولینس ئے اوڑسکان بننگ الیرہ۔ ننے خدشہ ءِ کہ ٹپی تے زو جانجوڑی کمک نہ ملنگ نا صورت ئٹ اوفتے جانء نسخان رسینگو۔
برانزی آ جاگہ و گْوادر شہر آن دا وخت سد آ بندغ آک بیگواہ ءُ۔ کیہی اُرا تیٹ چھاپہ خلکنو، داوخت گْوادر ئٹی ریاست قیامت برپا کرینے، ہزار آ بندغ آ تا زند خطرہ ٹی ءِ۔
بلوچ یکجہتی کمیٹی بلوچ لس تون اوار مظلوم راج آ تیان خواست کیک کہ گْوادر ئٹی ریاست نا بدترین درندگی، جبر و وحشت نا برخلاف زو سڑک آ تیا پیشتمیر، تیوعہ بلوچستان ئے بند کیر، ہر جاگہ آ برانز کیر، و تیوعہ بلوچستان ئٹی پیہہ جام و شٹرڈاؤن ہڑتال نا کال تننگیک۔
