بلوچ یکجہتی کمیٹی نا سربراہ ڈاکٹر ماہ رنگ بلوچ راج ئنا پن آ تینا کلوہ ئسیٹی پارے کہ کُل آن مُست ای نُما ہمت، بہادری، راہبند، توکل و باسمائی ئے دروت ندر کیوہ۔ اینو نُم نا تنیا پاکستانی ریاست بلکہ تیوعہ جہان ئے ہندا کلوہ تسونرے کہ ریاستی توفک و زور بندغ آتا مُچی نا مونا مش ئنا انبار ئسے۔ اینو نُما بہادری و توکل ریاست نا تونگری ئے مش تیتون اوار کرینے۔ اینو نن پدی زر گوادر دریا نا کنارہ ئٹ بندغ آتا دریائے خنان، اوفتا خن تیٹ جوش و جوزہ خنان، اوفک ایمن ءُ ولے ریاست نا ایٹم بمب آن گیس توانمندءُ ارافک قاتل آتا بے سہبی کن بسءُ۔
او پارے کہ بلوچ راجی مچی دا وخت پدی زر گوادر آ برانز ئنا دروشم ئٹ برجاء ءِ و داڑے اسہ نیمہ آن ہزار آتا کچ ئٹ ریاستی لشکر نا سلاہ بند کارندہ آکءُ و ایلو نیمہ آ کودک و پُر ایمن بلوچ ءُ۔ سلاہ بند آتا مونا بلوچ آتا توکل و جوزہ دُن باتیل نا مش آ بُڑزءِ۔ ای دا وخت ہندا کلوہ تننگ کن بسون اُٹ کہ بندغ آک گیش آن گیش گوادر آ سر مریر۔ راجی و بندغی حق آک بھلا شان انگا بندغی جہد آتون ہلنگ مریرہ۔ گوادر ننا سرڈغارءِ ننے راجی مچی برجاء تخنگ نا حق ارے۔ دا حق ئے ننے آن جہان نا ہچ وڑءُ زوراک ئس ہلنگ کپک۔
ڈاکٹر ماہ رنگ پارے کہ ننا برانز تیوعہ کاروان تہ گوادر آ سلامتی ئٹ سر مننگ و ننا دزگیر مروکا بندغ آتا آجو مننگ اسکان برجاء مرو۔ ہندا سوب آن نن ہر وڑءُ رنج و ڈکھ آتے برداشت کننگ و قربانی تننگ کن تیار اُن۔ ای کُل مخلوق، انجمن، سیاسی تنظیم و پارٹی تیتون خواست کیوہ کہ اوفک بلوچ راجی مچی ئے کمک کیر اوفک تینا مُختفی ئے کڑد ئنا دروشم ئٹ نشان تیر۔
