بلوچ یکجہتی کمیٹی نا گْوادر آ ہنوکا قافلہ آتا ریاستی زوراکی تا حوالہ ئٹ درشان ئٹی پاننگانے کہ اینو پاکستانی ریاست پھاش کرینے کہ بلوچستان اسہ کوزہ مروکو وطن ئسے و بلوچ اونا غلام اے۔
درشان ئٹی پاننگانے کہ بلوچ راج ئے تینا وطن آ آجوئی ئٹ چرّینگ تو مُر بلکہ آجوئی ئٹ زند گدریفنگ نا ہم حق اف۔ اینو ریاست ہرا زوراکی ئٹ بلوچ راج آ جلہو کرینے، داڑان پھاش مریک کہ او بلوچ ئے زندہ رہینگنگ نا حق اسُل چوف، دا حق ئے اوڑان پُھلوئی تمّو۔
جارکش نا پاننگ کہ ریاستی فوج و پولیس اینو مُچ بلوچستان ٹی راجی مُچی آ ہنوکا قافلہ آتا جلہو کرینُہ۔ نیاڑی و چُنا تون اوار امن ئٹ رہینگوک بندغاتا ٹِک سُم کاری کرینُہ۔ مستونگ ئٹی قافلہ آ ایف سی نا سُم کاری ٹی پانزدہ بندغ ٹھپی ءُ ہرافتان مُسٹ نا حالت نازرک اے و شال آ راہی کننگانُہ۔
ایلو نیمہ آ فوج ئنا سُم کاری آن تلار آرمی چیک پوسٹ گوادر آ نصیر احمد/صالح محمد پِنی آ بلوچ ورنا شہید مسنے، ہرانا لاش تربت اسپتال ئٹی اے۔
درشان ئٹی پاننگانے کہ گْوادر دا وخت آ تیبہ دنیا آن یکہ مروکے و مُچ وڑئٹ بند کروکے۔ اوڑے فوج ئنا لشکرکشی اے و کرفیو اے۔ بلوچ راج دا سخت انگا وخت آ اوار سلِہ و تینا راجی فرض ئے پورو کے۔
بی وائی سی نا جارکش پارے کہ مستونگ ئٹی ہم بلوچ راجی مُچی آ ہنوکاتا فوج سُم کاری کرینے ہراڑے عبدالمطلب بلوچ ئے سرغ ئٹی سُم ئس لگّانے اونا حالت نازرک اے و آئی سی یو ٹی اے۔ مستونگ ئٹی چھانڑدہ بندغ ئے سُم لگانے ہرافتان اِرٹ نا حالت نازرک اے۔
یات مرے کہ گْوادر شار مچا فوج ئنا پلویڑ ئٹی اے و غُٹ مواصلاتی وسیلہ آک توروک ءُ۔ موبائل نیٹ ورک و انٹرنیٹ بند ءُ۔
