گوادر تون اوار کیہی ہند آتا لشکری کارندہ آک راجی مچی تون اوار مننگ کن بروکا بندغ آتے توننگانے اگہ جلسہ کن النگ متو برانز کرون۔
بلوچ یکجہتی کمیٹی نا رہشون ڈاکٹر ماہ رنگ بلوچ راجی مچی ٹی اوار مروکاتے توننگ، کسرتے تفنگ تون اوار بندغ آتے گوادر ئٹی پیہنگ کن توننگ آ اسہ پیغام ئس شنگ کرسا تدینی تے شیف خلک۔
ماہ رنگ بلوچ تینا پیغام ئٹی پارے کہ دا وخت ریاستی لشکر تیوعہ گوادر شہرئے بند کرینے، بندغ آتے دزگیر و بیگواہ کننگءِ۔
ماہ رنگ بلوچ مونی پارے کہ تلار چیک پوسٹ نا خُڑک آ پاکستانی لشکر بلوچ راجی مچی ٹی اوار مروکاتے توننگ آن پد اوفتے زوراکی نا گواچی کننگءُ و جتا جتا شہر آتا ہڑاند تخیسہ بندغ آتے توننگ و لاری تے نسخان تننگءُ۔
ماہ رنگ بلوچ حکومت و انتظامیہ ئے تینا پیغام ئٹی صاف پارے کہ اگہ اوفتے پر ایمن جلسہ کن النگ متو گڑا ننا دا جلسہ برانز ئٹی بدل مرو و دانا تیوعہ ذمہ وار ریاست مرو۔
