مستونگ نا ہند آ ” بلوچ راجی مچی“ نا کاروان آ پاکستانی لشکر نا براہ راست سُمکاری آن چانڑدہ بندغ نا ٹپی مننگ نا حوال ءِ، ارافتیٹ اِرٹ نا حالیت خراب ءِ۔
حوالکار آتا رد ئٹ بلوچ راجی مچی نا کاروان ئے توننگ کن پاکستانی لشکر نا جتاء ہند آ تیا برانزی تیا بیدادی برجاء ءِ۔
ایلو نیمہ آ زوراکی ئٹ بیگواہ مروکا زاکر مجید و بیگواہ مروکا راشد بلوچ نا لمہ اَرا کہ تینا چُنا تا آجوئی کن کیہی سال آ تیان مسلسل جُہد کننگ ءُ۔ اَراوخت او سہب ئنا گوادر راجی مچی ٹی اوار مننگ کن شال آن پیشتمار اوفتے سونا خان نا ہند آ لشکر ہنوکا چار گھنٹہ آ تورینے۔
حوالکار آتا پاننگ ءِ کہ شال ئٹی بلوچ راجی مچی نا کاروان ئے وار وار پاکستانی لشکر نا ہڑاند آتے مون تروئی تمنگءِ۔
دشت کنڈ نا ہند آ کاروان ئے لشکر تورے، واہم برانزیک ہڑاند آتے مُر کننگ ئٹی سرسہب مسُر، ہموخت بس آتا شیشہ پرغنگ نا تدینی ہم رپورٹ مس۔
ایلو نیمہ گوادر ئٹی بلوچ راجی مچی تلار چیک پوسٹ آن خُڑک گدان خلوکا برانزی تے آ پاکستانی لشکر نا آنسو گیس شیلنگ و لاٹھی چارج مننگ آن پد ہم کیہی برانزیک آنسو گیس شیلنگ و لاٹھی چارج آن پد ہم ہڑاند آ تے مُر کریسہ گْوادر آ سر مننگ ئٹی سرسہب مسُر۔
کراچی ٹی بلوچ راجی مچی نا برانزی تے سندھ پولیس تورینے، برانزیک، برانز کریسہ بنجاہی کسر آ برانز کرینو۔
شابیتی حوال آتا رد ئٹ کراچی ٹرمینل ئٹی گْوادر بلوچ راجی مچی ٹی اوار مننگ کن ہنوکا بندغ آ تے پولیس تورینے، پولیس نا نیمہ آن بس آتے ہننگ الیپسہ۔ پولیس نا رویہ نا برخلاف بندغ آک بنجاہی کسر ئے برانز کریسہ بند کرینو۔
بلوچ راجی مچی نا برانزی تے سندھ ئٹی ہم پولیس نا نیمہ آن تورینو۔ برانزی تا رد ئٹ بس آتے جتاء بہانہ کریسہ مُستی ہننگ نا اجازت تننگ افس۔
