بلوچستان نا ساحلی شہر و سی پیک نا مرکز گوادر نا پیہوکا کسرک بند کننگانو، جاگہ جاگہ آ فوج تخنگانے۔
تیوعہ بلوچستان آن گوادر نا نیمہ آ بروکا کُل کسرتہ ہرانڈ تخیسہ کسرتے بند کننگانے و بلوچ راجی مچی ٹی اوار مروکا قافلہ آک جتا جتا ہند آتا پھسینگانو۔
کیہی ہند آتا لشکری کارندہ آک پیدل ہنوکا بندغ آتے ہم توننگءُ
کراچی آن خُڑک صنعتی شہر حب ئٹی کراچی، کوئٹہ و مکران آ ہنوکا بھلا کسرئے دارو ہوٹل نا ٹک آ کنٹینر تخیسہ بند کننگانے۔
کُل کسرک ریاست نا پاننگ ئٹ انتظامیہ نا نیمہ آن بند کننگانو تاکہ بندغ آک گوادر آ سر مننگ کپس۔
بھاز کسرتہ بھلو بھلوخل تخنگانے۔
نوشکی آن حوالءِ کہ سلطان چڑھائی نا ٹک آ انتظامیہ ٹینکر سلیفسہ تیوعہ کسرئے بند کرینے۔
پدا ہم بلوچستان نا جتا جتا ہند آتیان ہزار آتا کچ ئٹ بندغ آک قافلہ تہ دروشم ئٹ راجی مچی تون اوار مننگ کن پیش تمانو۔
یاتی مرے کہ پگہ 28 جولائی آ گوادر ئٹی بلوچ یکجہتی کمیٹی نا بھلنی ٹی بلوچ راجی مچی مننگءِ و اراٹی لکھ آتا کچ ئٹ بندغ آک اوار مننگءُ۔ ریاست نا نیمہ آن بے سہبءُ پندل کارمرز مننگءُ اوکان پد ہم بلوچ راج جزبہ تون اوار مننگءُ و دا راجی مچی ئے سہبمند کننگ کن بندغ آک باسنی ٹی ہم پیدل بننگءُ۔
