![](https://brahui.zrumbesh.com/wp-content/uploads/2024/07/IMG_4865-1024x558.jpeg)
کراچی آن پاکستانی لشکر نن نا نیمہ آ چھاپہ خلیسہ بلوچ یکجہتی کمیٹی نا باسک ئے زوراکی ئٹ بیگواہی نا گواچی کریسہ بیگواہ کرے۔
شابیتی حوال آ تا رد ئٹ نن نا نیمہ آ کراچی نا ہند ملیر ئٹی پاکستانی لشکر اُرا سے آ چھاپہ خلیسہ بالاچ پِنی او بندغ ئسے دزگیر ئٹی ہلنگ آن پد نا دُرست او جاگہ سے آ درے۔ بیگواہ مروکا بندغ بی وائی سی نا باسک ئسے اَرا بلوچ راجی مچی نا تیاری تیٹی بشخ ہلککہ۔
یاتی مرے کہ بلوچستان و کراچی آن کیہی دہنو خبر مِلانے ہرانگا بلوچ راجی مچی نا تیاری تیٹ آختہ بندغ آ تے لشکر نا نیمہ آ ہراساں کننگیرہ۔
ہنوکا دے کراچی آن پاکستانی لشکر پنچ بندغ ئے دزگیر کریسس ہراکہ دائسکان آجو مننگ کتوس۔ ایلو نیمہ غا ہنوکا دے تیٹ خضدار ئٹی ہم بی وائی سی نا باسک آ تے پمفلٹنگ نا وخت آ لشکر گھیرہ ٹی ہلیسہ دزگیر کننگ نا کوشست کرے واہم لس رد عمل آن پد لشکر اوفتے دزگیر کننگ ئٹی بے سہب مس۔
بالاچ نا زوراکی ئٹ بیگواہی نا حوالہ ئٹ بی وائی سی نا پاننگ ءِ کہ راجی مچی نا برخلاف ریاستی لشکر نا بی وائی سی نا برخلاف کریک ڈاؤن برجاء ءِ۔ او پک کریر کہ بالاچ ئے اُرا آن دزگیر ئٹی ہلنگ آن پد بیگواہ کننگانے۔