بلوچستان لبریشن فرنٹ نا جارکش میجر گہرام بلوچ میڈیا ٹی شنگ مروکو درشان ئسیٹی پارے کہ سرمچار آک ہنوکا شام ہشت بجہ آ خاران نا ہند البت ئٹی پاکستانی لشکر نا چوکی ئے پوسکن و خودکار سلاہ تیٹ ٹک کریر اراٹی دشمن نا اسہ کارندہ ئس خلنگا و اِرٹ ٹپی مسُر۔
اوفک پاریر کہ بی ایل ایف جنگی محاذ ئٹ قوضہ گیر پاکستان نا گھیرہ ئے تنک کرسا اوفتے نفسیاتی رد ئٹ بے سہب کرینے۔ نفسیاتی ناجوڈی نا گواچی مروکا دشمن لس مخلوق ئے نشانہ کیرہ و تینا بے سہبی نا بیرئے ہلنگ نا کوشست کیک۔ ولے دشمن ئے چائنگ خوائک قوضہ مروکءِ و ریاستی لشکرئے ہر ٹک آ نشانہ کرسا بے سہب کننگ مرو۔
جارکش ایسر ئٹ پارے کہ بی ایل ایف دا جلہو نا ذمہ واری ئے ہرفک و قوضہ مروکا بلوچستان نا آجوئی اسکان پاکستانی لشکرئے نشانہ کننگ مرو۔
