شال پریس کلب ئٹی پریس کانفرنس کرسہ ماہ رنگ بلوچ پارے کہ بلوچ یکجہتی کمیٹی بیست ءُ ہشت جولائی آ گْوادر ٹی ‘بلوچ راجی مُچی’ ئے اڈ تننگ نا پڑو کرینے۔ بلوچ راجی مُچی امن ئٹ اسہ سیاسی ءُ عمل ئسے ہرا بلوچ نسل کشی، بلوچستان نا مال ءُ مڈی تا لُٹ ءُ پُل و بلوچستان ٹی ہر وڑ ئنا بندغی حق آتا پامالی نا برخلاف بلوچ یکجہتی کمیٹی نا جہد ئنا بشخ ئسے۔
بلوچ یکجہتی کمیٹی اول دے آن امن دوستو سیاسی ءُ تنظیم ئس رہینگانے۔ لانگ مارچ آن ہلیس ننا غُٹ سیاسی کاریمک امن و ترتیب ئٹ مننگ ئٹی ءُ۔ ہنوکا تُو ئسے آن مچا بلوچستان ٹی بلوچ راجی مُچی نا تیاریک نظم ئٹ مننگ ئٹی ءُ و دا یام ئٹی بلوچ یکجہتی کمیٹی نا کُنڈان اسہ دہنو گام ئس ہم ہفنگتنے ہرا قانود نا برخلاف مرے۔ ولے ہنوکا اسہ ہفتہ سے آن بلوچ راجی مُچی ئے بےسوب کننگ نا کوشش مننگ ئٹی اے، بلوچ راجی مُچی نا برخلاف بلوچستان ٹی گوادر، خضدار، پسنی، کوہلو، قلات، تربت، حب، شال و ایلو شار تیٹ ننا نیاڑی و ایلو کاریم کروکاتہ بیہار تننگا و دزگیر ہم کننگا۔ کراچی ٹی مسہ باسک ئے لٹ کُٹ کننگانے و بیگواہ مروک ءُ۔ داکان ویتہ بھازاتا برخلاف ایف آئی آر کننگانے۔
او مُستی پارے کہ دا پنجاپ اف داڑے زور ئنا زیہا مخلوق ئے خُلیفنگ مفک، دا ننا روایت اف کہ زوراک نا مون آ کاٹم ئے شیف کین، ننا سرغاک قربان مننگ کیرہ ولے شیف مننگ کپّسہ، ننا دود ہندادے و دا ننا سیاسی تربیت نا بشخ ہم ارے۔ داسا دا نمے آٹہ کہ تینا چُھنائی تہ الّیرے و زمہ وارو ریاست ئسے نا ثبوت تیرے یا ہندا وڑ چُھنائی کرسہ کیرے۔ نن نمے دا ہم پانہ کہ ننے ہڑتوما کسر تیٹ مسئلہ اف، نن ہڑتوماتیٹ جْوان وڑئٹ چلّنگ کینہ۔ او بلوچ اُلس ئے پارے کہ ہرا وڑ نم بلوچ راجی مُچی کن بلوچ یکجہتی کمیٹی نا کمک ئے کننگ ئٹی اُرے داسا اوکان ہم زیات کبو۔ داسا نما زمہ واریک ارٹ مسّنہ۔
نن زوراکی آن خُلوکو قوم ئس افن، داسا بلوچیت ئے زندہ تخنگ کن لازمی اے کہ بلوچ دشمن آتا غرور ئے شیف کننگہ۔ گچین عوامی طاقت و جوزہ ئٹ مچّا بلوچ راج ‘بلوچ راجی مُچی’ ٹی بشخ ہلے۔
او مونا پارے کہ نن ریاست ئے پاننگ خواہینہ کہ بلوچ راجی مُچی ہر وڑئٹ مرو و گْوادر ٹی مرو، نی دادے توننگ کن ہخس زوراکی کیس ولے راجی مُچی مرو۔ اگہ نی ہندا وڑ زوراکی تہ برجا تخاس تو نن مچا بلوچستان نا کسر تہ بند کرون و بھلا سرکاری دفتر تا مون آ دھرنا چون۔
اگہ ریاست امن ئٹ بلوچ راجی مُچی ئے منّنگ الّا تو بلوچ یکجہتی کمیٹی دا نا زمہ ئے ہفّو کہ راجی مُچی ٹی اسہ گِڑاس ہم پنّوف، امن و نظم ئٹ مروکو دیوان ئس مرو۔ ولے اگہ راجی مُچی ئے توننگ نا کوشش مس و زوراکی مس ہندن مخلوق ئے خار تنّنگ نا چم کننگا۔ تو دا وڑئٹ نن عوام ئے ہِچ توننگ کروفن و دا نا غُٹ زمہ واری ریاست آ برو۔
