گْوادر بلوچستان ٹی بیست ءُ ہشت جولائی آ مروکا ‘بلوچ راجی مُچی’ ئے توننگ کن و اودے بےسوب کننگ کن ریاست ہر وڑ ئنا چم کننگ ئٹی اے۔
بلوچ راجی مُچی کن چندہ کننگ، دیوال نوشتہ، پنتاک (پمفلٹ) آ پابندی خلنگ تون اوار ہوٹل والاتہ ہم راجی مُچی آ بروکاتیکن اِرغ کننگ آن منع کننگانے۔ بھاز جاگہ آ مخلوق ئے خُلیفنگ ئٹی ءُ کہ دا مُچی ٹی بشخ ہلپبو نہ تو بیگواہ مرورے، و مُچ بلوچستان ٹی خوف تالان کننگ ئٹی ءُ کہ راجی مُچی ٹی گِڑاس مننگ کیک۔
حوال آتا رِدئٹ درو کراچی ٹی ‘بلوچ راجی مُچی’ نا بابت ئٹ نوشتہ کننگ و پنتاک بشخنگ نا زیہہ آ بی وائی سی نا چھار باسک ئے زورئٹ بیگواہ کننگانے۔
دا خبر ئے بلوچ یکجہتی کمیٹی نا بنجاہی جارکش ہم منّانے۔
تینا شنگ مروکا درشان ئٹی پارینے کہ بلوچ یکجہتی کمیٹی نا مُسہ باسک شہداد بلوچ، صدام بلوچ و باسط بلوچ ئے راجی مُچی کن دیوال آتا نوشتہ کننگ و پنتاک بشخنگ نا وخت ڈی ایس پی کلاکوٹ غیرقانودی وڑئٹ ہلکنے۔ ہر مسہ بلوچ ورنا ئے تھانہ آ دنّنگ آن پد ایجنسی تہ تنّنگا و او داسا تھانہ ٹی افس۔ منَہ گھنٹہ آن پد بی وائی سی کراچی نا اسہ پین باسک ئس فوج ہلکنے بیگواہ کرینے ہرانا پِن عبدالرحمن شاہ میر بلوچ اے۔
جارکش پارے کہ نن ریاست ئے پھاش و سِدھا پاننگ خواہینہ کہ بلوچ یکجہتی کمیٹی نا دا عوامی جہد ئے زورئٹ چُھٹفنگ ممکن اف۔ زوراکی کرسہ ریاست بلوچ اُلس ئے غصہ تنّنگ خواہیک ہراڑان پد مخلوق نا ہفّوکا گام ئنا مچّا زمہ واری ریاست آ برو۔
