گْوادر ٹی بیست ءُ ہشت جولائی آ مروکا ‘بلوچ راجی مُچی’ نا تیاری تا حوالہ ئٹ نواب اکبر بگٹی اسٹیڈیم خاران ئٹی دیوان ئس اڈ تنّنگا، ہراٹی نیاڑی و نرینہ آک بھلو کچ ئسیٹ بشخ ہلکُہ۔
بلوچ یکجہتی کمیٹی نا راہشون ڈاکٹر صبیحہ بلوچ و ایلوفک تران کرسہ پاریر کہ ننے بلوچ پجار نا پِن آ خلّنگ ئٹی ءُ۔ بلوچ ئے خلّنگ بھازا وڑئٹ برجا اے۔
او پاریر کہ دو سد سال مہالو نا بلوچ و اینو نا پین وڑ ءُ۔ دو سد سال مُست بلوچ نا تینا نظام ئس اس، اینو بلوچ نمازی، زگری و زات آتیٹ بشخنگوک اے۔
تران کروکا پاریر کہ بالاچ ئے خلسہ بی ایل اے نا دوبہ ئے خَلیرہ، ولے بالاچ نا لاش ئے خاہوت کسر آ تخک برانز کیک اوفتہ دا سما اے کہ بالاچ ولدا بروف واہم او برانز کیرہ کہ پین بالاچ ئسے تون دہن مف۔
او پاریر کہ اسہ خوانندہ ئس ہرا تینا راجی حق ئکن ہیت کیک، تو اودے ہفّنگ کن دہ فوجی گاڈی بریک ولے نشہ نا کروبار کروکا ہرا ننا نسل ئے نسخان تنّنگ ئٹی ءُ، اوفتہ کس پاپک۔ ننے یکجاہ مروئی اے و جہد کروئی اے تاکہ نن تینا مخلوق ئے بچفنگ کین۔
بی وائی سی نا راہشون آک تران کرسہ پاریر کہ بلوچ یکجہتی نا کاروان اینو مُچا بلوچ راج ئنا زمہ وارو تنظیم ئسے و تینا راجی زمہ واری تہ جْوانی ئٹ سرپند مننگ کیک، پورو کننگ کیک۔ خاران نا بلوچ مخلوق آن خواست اے کہ اگہ بلوچ راج ئے بچفنگ خواہیرے، دنیا ٹی یکجاہ ءُ راج ئس مروئی اے تو بیست ءُ ہشت جولائی آ راجی سنّتی و شرفداری ئے نشان تنّنگ نا دے اے۔
او پاریر کہ بیست ءُ ہشت جولائی آ راجی مُچی ئے سرسوب کننگ کن خاران نا مخلوق بلوچ یکجہتی کمیٹی نا چندہ مہم ئٹی جْوان وڑئٹ بشخ ہلسہ راجی زمہ واری ئے پورو کے۔
