بی ایل ایف نا جارکش میجر گہرام بلوچ میڈیا ٹی شنگ مروکو درشان ئسیٹی پارے کہ سرمچار آک گوادر آن پنجاب کن معدنیات دروکو اِرا ٹرالرتے جلہو ئٹی ٹک کرسا نسخان تسُر۔
کیچ ئنا ہند شہرک مادیان کور سی پیک کسرئے تفیسہ اسہ ٹرالر ئسے آ سُمکاری کرسا ٹائر تے برسٹ کرین و ایلو ٹرالرئے کسر نا نیام آ دریسہ ہشان۔
پنی آ چائنا پاکستان اقتصادی راہداری ئے پاکستانی لشکر دیمرئی نا ذریعہ سمجھک و ہندا منصوبہ نا سہبمندی کن پاکستان بلوچستان آ لشکر کشی کرسا لس عوام ئے زوراکی ئٹ بیگواہ، جشوک جون و ہنپ و لڈ سوگات کرینے۔ ولے دشمنی نا صف تیان نا پوہ انگا پاکستانی لشکر بلوچ سرمچار آتا مونا تینا پام ئے گوہک۔
بی ایل ایف داکان مُست ہم کاروباری مخلوق ئے پارینے کہ بلوچستان ئسے جنگ زدہءُ ہند ئسے اراڈے پاکستانی ظلم و جبر ئنا مونا بلوچ سرمچار عوام نا کمک تون دیوار ئس جوڑءِ۔ نن اسہ وارس پدا کاروبار تون تفوک مخلوق ئے خبردار کینہ کہ پاکستان نا ہچو منصوبہ سیٹی تعاون و کمک تروکاک راج ئنا دشمن چائنگ مریرہ ہندا سوب آن پاکستانی لشکر نا منصوبہ تیان تینے مُر تخبو اگہ نا نسخان نا ذمہ وار تینٹ مرورے۔
جارکش ایسر ئٹ پارے کہ بلوچستان لبریشن فرنٹ دا جلہو نا ذمہ واری ئے ہرفک و بروکا وخت ئٹ سخت جلہو تیٹ پاکستان ئے پیشن تمنگ کن مجبور کننگ نا قول کیک۔
