ڈھاکہ بنگلہ دیش ئٹی خونی آ برانز آتیٹ سی ءُ پنچ بندغ خلّنگ آن پد ملک ئٹی کرفیو اے۔
دا وخت بنگلہ دیش ئٹی خوانندہ آک نوزدہ سد ءُ ہفتاد ءُ یک ئٹی آجوئی نا جنگ ئٹی بشخ ہلوکاتا خاہوت آتیک ملازمی نا کوٹہ ئے چُھٹّفنگ نا خواست کننگ ئٹی ءُ۔
جمعہ آ مظاہرہ ٹی نرسندگی جیل آ ہم جلہو کننگا ہراڑان کیئی بندیک نّرار۔ اوکا پد وزیراعظم نا دفتر ملک ئٹی کرفیو نا پڑو کرے۔
یات مرے کہ بنگلہ دیش ئٹی خونی آ برانز آتیٹ داسکان شست ءُ ہفت بندغ خلّنگانے۔ ولے ملک ئٹی حال حوال نا نظام نا خرابی نا سوَب خلّنگوکاتا کچ ئنا جاچ ئے ہلّنگ سخت اے۔ حوال آتا رِدئٹ مُچا ملک ئٹ موبائل انٹرنیٹ و ٹیلی فون نا نظام جْوان اف۔
بنگلہ دیش نا خوانندہ آتا پاننگ کہ دا وخت آ ملک ئٹی کوٹہ نا نظام اوفتا حق ئے خَلیک، او گُشاد نا زیہہ آ ملازمت تنّنگ نا خواست کرینُہ۔
بنگلہ دیش نا اپوزیشن جماعت نیشنل پارٹی ہم برانز نا پڑو کرینے۔ ایکس (ٹویٹر) آ ملک آن پیشن دا جماعت نا کماش طارق الرحمن اُلس آن خوانندہ آتا ہم توار منّنگ نا خواست کرینے۔ برانز ئے ایسر کننگ نا بابت ئٹ داسکان گپ ءُ تران ئٹی سرسوبی متنے۔
