بلوچستان لبریشن فرنٹ نا ترجمان میجر گہرام بلوچ تینا شنگ کروک بیان ئٹی پارے کہ بلوچ سرمچار آک کیچ ئنا عیلاقہ بلیدہ گلی ٹی پاکستانی لشکر نا قافلہ سے آئی ای ڈی جلہو ئٹ ٹک کریر، جلہو نا زد ئٹی برِسہ اسہ لاری ئس تیوہ غا تباہ مس ہراٹی سوار کُل کارندہ غاک کھسکر۔
او پارے کہ اینو سہب ئنا ہشت بجہ غا زامران ئٹی آپریشن نا عرض ئٹ ہنوکا پاکستانی لشکر نا چِل لاری نا قافلہ ئے بلیدہ گلی ٹی سرمچار آک ٹک کریر۔ جلہو ئٹی اسہ لاری ئس تیوہ غا تباہ مس ہراٹی اسہ جونیئر افسر ئسے تون اوار ہشت کارندہ سپاہی جنید، سپاہی آصف رشید، سپاہی وحید، سپاہی عثمان غنی، سپاہی آصم، سپاہی نادر، سپاہی رحیم کھسکر۔
اونا پاننگ اس کہ بلوچستان لبریشن فرنٹ نا سرمچار آک عسکری و انٹیلجنس بنیاد آ پاکستانی لشکر ئے بلوچستان نا ہر عیلاقہ ٹی ٹِک کرِسہ جانی و مالی نسخان تننگو ہرانا سوب آن بلوچستان ئٹی پاکستانی لشکر تینا مورال و حواس ئے گوئانے۔ ہندا بد حواسی نا عالم ئٹی سرمچار آتا خلیس آن لس آبادی ٹی چھاپہ، زورانسری بےگواہی و ایلو جرم آتے کننگے و تینا تموکا مورال ئے بڑز کننگ نا ناکام آ کوشست ئے کننگ ئٹی ءِ۔
ترجمان پارے کہ بی ایل ایف دا پک کیک کہ بلوچستان ئٹی روان جنگ بلوچ لس مخلوق نا ءِ و دا جنگ ئٹی بی ایل ایف بلوچ لس مخلوق نا کمک و تعاون آن مونا ہنِنگ ئٹی ءِ و بروک آ وخت ئٹی پاکستانی لشکر و اونا ہمنوا تے آ پین ترندی ئٹ جلہو کننگ مروئے۔
او ایسر ئٹ پارے کہ بلوچستان لبریشن فرنٹ دا جلہو نا ذمہ واری ئے ہرفک و سوغند کیک کہ اسہ آجو و خوشحال ءُ بلوچستان ئسے نا دوئی کننگ اسکان پاکستان نا مفاد آتے بلوچستان ئٹی ٹک کننگ مروئے۔
